करोना रुग्णांसाठी देवदूत ठरतोय हा भारताचा क्रिकेटपटू, ऑक्सिजन सिलेंडरपासून बेड्सपर्यंत सर्व व्यवस्था करतोय

नवी दिल्ली : सध्याच्या घडीला भारताचा एक क्रिकेटपटू करोना रुग्णांसाठी देवदूत ठरत आहे. कारण जिथे सरकार करोना रुग्णांना ऑक्सिजन देऊ शकत नाही, जिथे बेड्स नाहीत तिथे सर्व सुविधा पुरवताना हा खेळाडू दिसत आहे. फक्त एवढेच नाही तर करोना रुग्णांसाठी प्लाझ्माचीही व्यवस्था त्याने केलेली आहे. हा खेळाडू सध्या इंग्लंडमध्ये असला तरी भारतीयांसाठी तो धावून आला आहे. भारताचा क्रिकेटपटू हनुमा विहारी () भारतातील करोना रुग्णांसाठी सर्वतोपरी मदत करताना दिसत आहे. विहारीने इंटरनेटवर एक ग्रुप बनवला आहे, यामध्ये करोना रुग्णांसाठी हॉस्पिटलमध्ये बेड्स उपलब्ध करून दिले जातात, त्याचबरोबर ज्यांना ऑक्सिजनची गरज आहे त्यांना ऑक्सिजन सिलेंडर उपलब्ध करून दिले जातात. सध्याच्या घडीला विहारी इंग्लंडमध्ये असला तरी भारतामधील करोना रुग्णांना मदत करण्यासाठी तो कोणतीही कमी ठेवताना दिसत नाही. विहारीने सध्याच्या घडीला १०० व्हेंटिलेटर्सची एक टीम बनवली आहे. आमच्या मित्रांच्या मदतीने ज्यांना गरज लागेल त्यांना सर्व गोष्टी विहारी उपलब्ध करून देत आहे. फक्त एवढ्यावरच हनुमा थांबलेला नाही, तर तो करोना रुग्णांसाठी भोजनाचीही व्यवस्था करत आहे. त्याचबरोबर कोणाला प्लाझ्मा हवा असेल तर तेदेखील विहारी उपलब्ध करून देताना पाहायला मिळत आहे. त्यामुळे सध्याच्या घडीला तर विहारी हा भारतातील करोना रुग्णांसाठी देवदूत ठरत असल्याचेच पाहायला मिळत आहे. याबाबत विहारीने एका मुलाखतीमध्ये सांगितले की, " मला स्वत:ची स्तुती करायची नाही. गरजू लोकांना माझ्याकडून थोडीतरी मदत मिळावी, हे माझे ध्येय आहे. त्यासाठीच मी सर्वतोपरी प्रयत्न करत आहेत. सध्याच्या घडीला भारतामध्ये कठीण काळ आहे आणि त्यावेळी आपण सर्वांनी मदतीचा हात पुढे करायला हवा, असे मला वाटते. करोनाची दुसरी लाट ही घातक असल्याचे दिसत आहे. या परिस्थितीमध्ये लोकांना हॉस्पिटलमध्ये बेड्स मिळताना दिसत नाही. या गोष्टीचा विचारच मी करू शकत नाही. मी माझ्या चाहत्यांच्या आणि मित्रांच्या माध्यमातून गरजू लोकांना मदत करण्याचा निर्णय घेतला आहे."

from Cricket News in Marathi, क्रिकेट न्यूज़, क्रिकेट ताज्या बातम्या, Marathi Cricket News https://ift.tt/2Qku2CU