दुबई : सनरायझर्स हैदराबादच्या डेव्हिड वॉर्नर आणि वृद्धिमान साहा या दोघांनी मुंबई इंडियन्सच्या गोलंदाजीची पुरती दाणादाण उडवली. वॉर्नर आणि साहा या दोघांनी अर्धशतके झळकावत मुंबईच्या गोलंदाजांना आपल्या समोर नतमस्तक व्हायला बाद पाडले. या दोघांच्या धडाकेबाज फलंदाजीच्या जोरावर हैदराबादने मुंबईवर १० विकेट्स राखून दणदणीत विजय मिळवला. या विजयासह हैदराबादने आयपीएलच्या प्ले-ऑफमध्ये आपले स्थान निश्चित केले आहे. आता प्ले-ऑफमध्ये हैदराबादचा सामना आरसीबीच्या संघाबरोबर होणार आहे. वॉर्नरने यावेळी ५८ चेंडूंत १० चौकार आणि एका षटकारासह नाबाद ८५ धावांची तुफानी खेळी साकारली. साहाने यावेळी वॉर्नरला चांगली साथ देत ४५ चेंडूंत सात चौकार आण् एका षटकारासह नाबाद ५८ धावा फटकावल्या. मुंबईने हैदराबादपुढे विजयासाठी १५० धावांचे आव्हान ठेवले होते. पण वॉर्नर आणि साहा यांनी हैदराबादच्या धावसंख्येला चांगला आकार दिला. या दोगांनी सुरुवातीला थोडी संयत फलंदाजी केली. पण स्थिरस्थावर झाल्यावर या दोघांनी मुक्तपणे फलंदाजी करत मुंबईच्या गोलंदाजीचा चांगलाच समाचार घेतलेला पाहायला मिळाला. वॉर्नरने यावेळी षटकारासह आपले अर्धशतक साजरे केले. त्यानंतर काही चेंडूंमध्येच साहानेही आपले अर्धशतक साजरे करत संघाला दमदार सुरुवात करून दिली. वॉर्नर आणि साहा यांनी संघाला शतकी सलामी दिली. या सलामीच्या जोरावरच हैदराबादने सहजपणे मुंबईचा पराभव केल्याचे पाहायला मिळाले. अर्धशतक झळकावल्यावर वॉर्नर हा साहापेक्षा अधिक आक्रमक खेळायला लागला. त्यामुळेच हैदराबादला जास्त चेंडू राखत मुबंईवर दिमाखात विजय मिळवता आला. मुंबई इंडियन्सचे फलंदाज एकामागून एक बाद होत असताना किरॉन पोलार्डने धमाकेदार फलंदाजी करत यावेळी संघाला तारले. पोलार्डने यावेळी २५ चेंडूंत दोन चौकार आणि चार षटकारांच्या जोरावर ४१ धावांची तुफानी खेळी साकारली. पोलार्डच्या या वादळी खेळीच्या जोरावर मुंबईला सनरायझर्स हैदराबादच्या संघापुढे १५० धावांचे आव्हान ठेवता आले. आजच्या सामन्यात रोहित शर्मा हा दुखापतीनंतर पुनरागमन करत होता. त्याचबरोबर सनरायझर्स हैदरााबदने नाणेफेक जिंकत गोलंदाजी स्वीकारली आणि रोहित लवकरच फलंदाजीसाठी आलेला पाहायला मिळाला. रोहित या पुनरागमनाच्या सामन्यात किती धावा करणार, याची उत्सुकता सर्वांनाच होती. रोहितने संयतपणे सुरुवात केली. पण एक मोठा फटका मारण्याच्या नादात रोहित बाद झाला. रोहितला यावेळी चार धावांवरच समाधान मानावे लागले.
from Cricket News in Marathi, क्रिकेट न्यूज़, क्रिकेट ताज्या बातम्या, Marathi Cricket News https://ift.tt/388fmxe
No comments:
Post a Comment