विराट कोहली खेळला नाही तरी भारतीय संघ जिंकू शकतो, सुनील गावस्कर नेमकं काय म्हणाले पाहा..

भारताचा कर्णधार विराट कोहलीच्या घरी जानेवारी महिन्यामध्ये पाळणा हलणार आहे. त्यामुळे कोहली ऑस्ट्रेलियाविरुद्धच्या तीन कसोटी सामन्यांना मुकणार असून तो भरतामध्ये परणार आहे. पण कोहली खेळला नाही तरी भारतीय संघ जिंकू शकतो, असे स्पष्ट मत भारताचे माजी कर्णधार आणि समालोचक सुनील गावस्कर यांनी व्यक्त केले आहे. कोहली न खेळल्यावर भारताने कोणते सामने जिंकले आहे, याचा हिशोबही गावस्कर यांनी यावेळी दिला आहे. गावस्कर यांनी यावेळी सांगितले की, " विराट कोहलीविनाही भारतीय संघ मजबूत आहे. आतापर्यंत कोहली ज्या सामन्यांमध्ये खेळलेला नाही ते सामने भारताने जिंकलेले आहेत. ऑस्ट्रेलियाविरुद्ध धर्मशाळा येथे झालेल्या कसोटी सामन्यात कोहली खेळला नव्हता, पण भारतीय संघ हा सामना जिंकला होता. श्रीलंकेत झालेल्या निदाहास ट्रॉफीमध्येही कोहली खेळला नव्हता. पण भारताने या स्पर्धेचे जेतेपद पटकावलेले होते. त्याचबरोबर अफगाणिस्तानविरुद्धच्या कसोटी सामन्यातही कोहली खेळला नव्हता, त्या सामन्यातही भारताने विजय मिळवला होता. त्यामुळे कोहली संघात नसला तर संघाचे मोठे नुकसान होईल, असे तरी सध्याच्या घडीला दिसत नाही." गावस्कर पुढे म्हणाले की, " कोहली जर तीन कसोटी सामने खेळणार नसेल तर अजिंक्य रहाणेसाठी हे एक मोठे आव्हान असेल. कारण कोहली संघात नसताना अजिंक्यकडे भारतीय संघाचे नेतृत्व येऊ शकते. पण अजिंक्य हे दडपण योग्यपद्धतीने हाताळू शकतो, असा मला विश्वास आहे. यापूर्वीही अजिंक्यने भारतीय संघाचे नेतृत्व केले आहे. त्यामुळे तो यावेळीही चांगली कप्तानी करेल, असा मला विश्वास आहे." पण ऑस्ट्रेलियाचा माजी कर्णधार रिकी पॉन्टिंगने मात्र कोहली खेळणार नसेल तर भारतीय संघावर जास्त दडपण येईल, असे म्हटले होते. तो म्हणाला की, " जर विराट कोहली खेळणार नसेल तर भारतीय संघा दडपणाखाली येईल. कारण त्यावेळी अजिंक्य रहाणेवर कर्णधारपदाचे दडपण असेल. त्याचबरोबर कोहलीची फलंदाजीचे स्थान नेमका कोणता फलंदाज घेणार, हा प्रश्न भारतीय संघ व्यवस्थापनाला सोडवावा लागणार आहे. त्यामुळे कोहली खेळत नसताना भारतीय संघ दडपण कसे हाताळतो, हे पाहणे उत्सुकतेचे ठरणार आहे."

from Cricket News in Marathi, क्रिकेट न्यूज़, क्रिकेट ताज्या बातम्या, Marathi Cricket News https://ift.tt/2HsluWc