सचिन तेंडुलकरने आजच्याच दिवशी रचला होता विश्वविक्रम, अजूनही आहे अबाधित..

नवी दिल्ली : भारताचा माजी महान क्रिकेटपटू सचिन तेंडुलकरने आजच्याच दिवशी एका विश्वविक्रमाला गवसणी घातली होती. सचिनचा हा विश्वविक्रम अजूनही अबाधित असून तो अजूपर्यंत कोणालाही मोडता आलेला नाही. आजच्या दिवशी ११ वर्षांपूर्वी सचिनने हा विश्वविक्रम केला होता. सचिनने २० नोव्हेंबर २००९ साली अहमदाबाद येथे श्रीलंकेविरुद्ध खेळत असताना हा विश्वविक्रम प्रस्थापित केला होता. सचिनने आजच्या दिवशी आंतरराष्ट्रीय क्रिकेटमध्ये आपल्या ३० हजार धावा पूर्ण केल्या होत्या. श्रीलंकेविरुद्धच्या पहिल्या कसोटी सामन्याच्या अखेरच्या दिवशी हा विश्वविक्रम रचला होता. श्रीलंकेविरुद्धच्या पहिल्या कसोटी सामन्याच्या दुसऱ्या डावात ३५ धावा पूर्ण केल्या आणि आंतरराष्ट्रीय क्रिकेटमधील एकूण ३० हजार धावांचा टप्पा गाठला होता. या दुसऱ्या डावात सचिनने श्रीलंकेचा गोलंदाज चनाका वेलेगेदराच्या चेंडूवर डीप स्क्वेअर लेगला एक फटका मारत एकेरी धाव घेतली आणि हा विश्वविक्रम आपल्या नावावर केला होता. सचिनने त्यावेळी कोणत्या क्रिकेट प्रकारात किती धावा केल्या होत्या, पाहा...सचिनने त्यावेळी ४३६ एकदिवसीय सामन्यांमध्ये ४४.५०च्या सरसरीने १७, १७८ धावा केल्या होत्या. त्याचबरोबर कसोटी क्रिकेटमध्ये सचिनने १२, ८१२ धावा पूर्ण केल्या होत्या. एकमेव ट्वेन्टी-२० क्रिकेटमध्ये सचिनने १० धावा केल्या होत्या. या तिन्ही क्रिकेटच्या प्रकारांमधील आपण धावांची धावांची बेरीत केली (१७, १७८, १२, ८१२ आणि १०) तर ती ३० हजार एवढी होते. आतापर्यंत सचिनचा हा विश्वविक्रम आतापर्यंत कोणालाही मोडता आलेला नाही. आंतरराष्ट्रीय क्रिकेटमधील सर्वाधिक धावांच्या यादीमध्ये सचिन अव्वल स्थानावर आहे. या यादीमध्ये सचिननंतर श्रीलंकेचा महान फलंदाज कुमार संगकाराचा क्रमांक लागतो. संगकाराने आंतरराष्ट्रीय क्रिकेटमध्ये एकूण २८, ०१६ धावा केल्या आहेत. या यादीमध्ये ऑस्ट्रेलियाचा माजी कर्णधार रिकी पॉन्टिंगचा तिसरा क्रमांक लागतो. पॉन्टिंगने आंतरराष्ट्रीय क्रिकेटमध्ये एकूण २७, ४८३ धावा केल्या आहेत. सचिनने आतापर्यंत २०० कसोटी सामन्यांमध्ये १५, ९२१ धावा केल्या आहेत, त्याचबरोबर ४६३ एकदिवसीय क्रिकेटमध्ये सचिनच्या नावावर १८, ४२६ एवढ्या धावा आहेत. एकमेव ट्वेन्टी-२० सामन्यात सचिनने १० धावा केल्या होत्या. त्याचबरोबर सचिनने कसोटी आणि एकदिवसीय क्रिकेटमध्ये अनुक्रमे ४६ आणि १५४ विकेट्सही मिळवल्या आहेत.

from Cricket News in Marathi, क्रिकेट न्यूज़, क्रिकेट ताज्या बातम्या, Marathi Cricket News https://ift.tt/3pPu7LU