आयसीसीच्या दहा वर्षांतील सर्वोत्तम क्रिकेटपटूंच्या पुरस्कारासाठी नामांकने जाहीर, भारताच्या दोन खेळाडूंना संधी

दुबई : गेल्या दहा वर्षांमध्ये सातत्याने नेत्रदीपक कामगिरी करणाऱ्या खेळाडूंमध्ये आता चांगलीच चुरस पाहायला मिळणार आहे. कारण आंतरराष्ट्रीय क्रिकेट परिषदेने (आयसीसी) आता गेल्या दहा वर्षांतील सर्वोत्तम क्रिकेटपटू कोण, असा एक पुरस्कार जाहीर केला आहे. या पुरस्काराच्या नामांकनामध्ये भारताच्या दोन खेळाडूंनी स्थान पटकावले आहे. गेल्या दहा वर्षांमध्ये भारताकडून कर्णधार विराट कोहलीने दमदार कामगिरी केली आहे. त्यामुळे आयसीसीने या पुरस्कारासाठी कोहलीला नामांकन दिले आहे. आता दुसरा खेळाडू नेमका कोण असेल, याबाबत आयसीसीने जो भारतीय खेळाडू निवडला आहे, त्याचे नाव ऐकल्यावर चाहत्यांना सुखद धक्का बसू शकतो. कारण या खेळाडूला आतापर्यंत हवी तशी प्रसिद्धी मिळाली नव्हती. पण गेल्या दहा वर्षांमध्ये भारताच्या या खेळाडूने चांगली कामगिरी केली आहे. या पुरस्कारासाठी नामांकन मिळालेला दुसरा खेळाडू आहे भारताचा फिरकीपटू आर. अश्विन. त्याचबरोबर जगभरातील एकूण सात खेळाडूंना या पुरस्कारासाठी नामांकन मिळालेले आहे. या पुरस्कारासाठी ऑस्ट्रेलियाचा माजी कर्णधार स्टीव्हन स्मिथला नामांकन देण्यात आले आहे. स्मिथने गेल्या दहा वर्षांमध्ये धडाकेबाज फलंदाजी केली आहे. त्याचबरोबर त्याने ऑस्ट्रेलियाचे नेतृत्व करताना संघाला विजयही मिळवून दिले आहेत. या पुरस्कारासाठी न्यूझीलंडचा कर्णधार केन विल्यम्सनलाही नामांकन देण्यात आले आहे. एक कुशल कर्णधार म्हणून केनचे नाव घेतले जाते. न्यूझीलंडच्या संघाची अप्रतिम बांधणी केनने केली आहे. त्याचबरोबर केन कधीही मैदानात आक्रमक झालेला किंवा रागावलेला पाहायला मिळालेला नाही. क्रिकेट हा सभ्य गृहस्थांचा खेळ समजला जातो, तसेच वागणे केनचे आतापर्यंत पाहायला मिळाले आहे. आपल्या धमाकेदार फलंदाजीने क्रिकेट विश्वाचे मन जिंकलेल्या एबी डिव्हिलियर्सलाही या पुरस्कारासाठी नामांकन देण्यात आले आहे. आतापर्यंत एबीने धडाकेबाज फलंदाजी केली असून बरेच विक्रम त्याच्या नावावर आहेत. या पुरस्कारासाठी इंग्लंडचा कर्णधार जो रुटलाही नामांकन मिळालेले आहे. रुटने इंग्लंडच्या कसोटी संघाचे समर्थपणे नेतृत्व केले आहे. त्याचबरोबर संघाला बरेच विजयही मिळवून दिले आहेत. श्रीलंकेचा माजी कर्णधार कुमार संगकारालाही या पुरस्कारासाठी नामांकन देण्यात आले आहे.

from Cricket News in Marathi, क्रिकेट न्यूज़, क्रिकेट ताज्या बातम्या, Marathi Cricket News https://ift.tt/3m3jz9r