सूर्यकुमार यादवला भारतीय संघात स्थान मिळाले नव्हते. भारतीय संघाची निवड झाल्यावर आयपीएलमध्ये मुंबई इंडियन्स आणि विराट कोहलीच्या नेतृत्वाखालील आरसीबीचा एक सामना झाला होता. या सामन्यात मुंबई इंडियन्सचा संघ फलंदाजी करत असताना कोहली आणि सूर्यकुमार यांच्यामध्ये बाचाबाची झाल्याचे चाहत्यांचे म्हणणे होते. याबाबतचा खुलासा आता सूर्यकुमारने केल्याचे पाहायला मिळत आहे. सूर्यकुमारने मारलेला एक चेंडू कोहलीच्या हातामध्ये गेला होता. त्यावेळी कोहली चेंडू घेऊन सूर्यकुमारकडे आल्याचे पाहायला मिळाले होते. त्यानंतर सूर्यकुमारने अर्धशतक झळकावत मुंबई इंडियन्सला विजय मिळवून दिला होता. या सामन्यानंतर सूर्यकुमार आणि कोहली यांच्यामध्ये काहीतरी बोलणे झाल्याचे पाहायला मिळाले होते. त्यानंतर चाहत्यांना सोशल मीडियावर कोहलीला चांगलेच ट्रोल केले होते. सूर्यकुमार याबाबत म्हणाला की, " मुंबई इंडियन्स आणि आरसीबी यांच्यातील सामना संपल्यावर विराट कोहली माझ्याकडे आला होता. त्यावेळी कोहली मला म्हणाला की, तुझी खेळी ही चांगली होती, तु चांगली फलंदाजी केली. त्यानंतर कोहलीने माझ्याबरोबर अजूनही काही गोष्टींवर संवाद साधला होता. पण या सर्व गोष्टी सामान्य होत्या. त्यामध्ये वावगे असे काहीच नव्हते." सूर्यकुमार यादव गेल्या काही वर्षांपासून सातत्याने चांगली कामगिरी करत आहे. या आयपीएलमध्ये सूर्यकुमारने चांगली कामगिरी केली होती. पण तरीही त्याला भारतीय संघात स्थान देण्यात आले नव्हते. त्यामुळे चाहत्यांनी विराट कोहलीवर टीका केली होती. संघात निवड झाली नाही हे पाहिल्यावर सूर्यकुमार मुंबई इंडियन्सचा कर्णधार रोहित शर्माच्या रुममध्ये गेला होता. त्यानंतर मी या सर्व गोष्टी विसरलो असून आता मी मुंबई इंडियन्सवर लक्ष केंद्रीत केले आहे, असे सूर्यकुमारने रोहितला सांगितले होते. रोहित याबाबत म्हणाला की, " भारतीय संघाची ऑस्ट्रेलियाच्या दौऱ्यासाठी निवड करण्यात आली होती. या संघात सूर्यकुमारचे नाव नव्हते. त्यामुळे तो थोडा निराश झाला होता. त्यावेळी सूर्यकुमार माझ्या रुममध्ये होता. सूर्यकुमार नाराज असल्यामुळे मी त्याच्याशी काहीच बोलत नव्हतो. पण त्यानंतर सूर्यकुमारच माझ्याजवळ आला आणि म्हणाला, मी ही गोष्ट आता विसरुन गेलो आहे. त्यामुळे माझे लक्ष आता फक्त मुंबई इंडियन्सच्या विजयावर केंद्रीत केलेले आहे."
from Cricket News in Marathi, क्रिकेट न्यूज़, क्रिकेट ताज्या बातम्या, Marathi Cricket News https://ift.tt/331yMAo
No comments:
Post a Comment