जोहान्सबर्ग : इंग्लंडविरुद्धच्या एकदिवसीय आणि ट्वेन्टी-२० सामन्यांच्या मालिकेपूर्वी दक्षिण आफ्रिकेच्या संघाला जोरदार धक्का बसला आहे. या मालिकेपूर्वीच दक्षिण आफ्रिकेचा एक क्रिकेटपटू करोना पॉझिटीव्ह आढळला आहे. त्याचबरोबर या खेळाडूच्या संपर्कात आलेल्या दोन अन्य खेळाडूंना विलगीकरणामध्ये ठेवण्याचा निर्णय दक्षिण आफ्रिकेच्या क्रिकेट मंडळाने घेतला आहे. दक्षिण आफ्रिकेच्या क्रिकेट मंडळाने याबाबतचे पत्रक काढले असून त्यामध्ये सर्व माहिती देण्यात आली आहे. दक्षिण आफ्रिकेच्या ज्या क्रिकेटपटूला करोना झाला आहे त्याचे नाव क्रिकेट मंडळाने जाहीर केलेले नाही. आपल्या पत्रकामध्ये दक्षिण आफ्रिकेच्या क्रिकेट मंडळाने म्हटले आहे की, " सध्याच्या घडीला आमच्या संघातील एका खेळाडूला करोना झाल्याचे आम्हाला समजले आहे. त्यामुळे आता संघाचा वैद्यकीय चमूने त्याला आपल्या देखरेखीखाली ठेवले आहे आणि त्याच्यावर उपचारही सुरु आहेत. त्याचबरोबर या खेळाडूच्या संपर्कात दोन खेळाडू आले होते. सुरक्षेचा उपाय म्हणून आम्ही दोन्ही क्रिकेटपटूंना विलगीकरणामध्ये ठेवले आहे." आपल्या या पत्रकात दक्षिण आफ्रिकेच्या क्रिकेट मंडळाने म्हटले आहे की, " हे तिन्ही खेळाडू आमच्या देखरेखीखाली आहेत. त्यामुळे या तिन्ही खेळाडूंसाठी बदली खेळाडू आम्ही देण्याचा विचार केलेला नाही. ज्या दोन खेळाडूंना विलगीकरणामध्ये ठेवले आहे, त्यांना २१ नोव्हेंबरला आम्ही सराव करण्याची संधी देणार आहोत. इंग्लंडविरुद्ध दोन हात करण्यापूर्वी सर्व क्रिकेटपटू आणि सपोर्ट स्टाफच्या करोना चाचण्या केल्या होत्या. त्यामुळे जो अहवाल आमच्याकडे आलेला आहे त्यानुसार घाबरण्याचे कोणतेही कारण नाही." इंग्लंड आणि दक्षिण आफ्रिका यांच्यातील ट्वेन्टी-२० क्रिकेट मालिकेला सुरुवात होणार आहे. या मालिकेतील पहिला सामना केपटाऊनला होणार आहे. त्याचबरोबर एकदिवसीय मालिकेची सुरुवात ४ डिसेंबरला होणार आहे. केपटाऊनमध्येच एकदिवसीय मालिकेला सुरुवात होणार आहे. तीन एकदिवसीय सामन्यांची ही मालिका असणार आहे. पण या मालिकेपूर्वीच आफ्रिकेच्या संघाला मोठा धक्का बसला आहे. आता कोणत्या खेळाडूला नेमका करोना झालेला आहे, याबाबतची अधिकृत माहिती दक्षिण आफ्रिकेच्या क्रिकेट मंडळाने दिलेली नाही.
from Cricket News in Marathi, क्रिकेट न्यूज़, क्रिकेट ताज्या बातम्या, Marathi Cricket News https://ift.tt/2IPgRpL
No comments:
Post a Comment