भारतीय संघातील धोनीची जागा घेऊ शकतो मुंबई इंडियन्सचा 'हा' खेळाडू, सातव्या वर्षीच भूषवले होते कर्णधारपद

नवी दिल्ली : भारताचा माजी कर्णधार महेंद्रसिंग धोनीने आंतरराष्ट्रीय क्रिकेटमधून निवृत्ती घेतलेली आहे. त्यामुळे आता त्याची भारतीय संघातील जागा कोण घेऊ शकतो, यावर चर्चा सुरु आहे. पण आयपीएलमध्ये चमकलेला एक खेळाडू धोनीची जागा घेऊ शकतो, असे म्हटले जात आहे. वयाच्या सातव्या वर्षीच या खेळाडूने कर्णधारपदही भूषवले होते. त्यामुळे हा खेळाडू धोनीचा उत्तराधिकारी आहे, असे म्हटले जात आहे. हा खेळाडू नेमका आहे तरी कोण, पाहा... यंदाच्या आयपीएलमध्ये सर्वाधिक षटकारांचा पुरस्कार पटकावला होता तो मुंबई इंडियन्सच्या इशान किशनने. इशानने वयाच्या सातव्या वर्षी कर्णधारपद भूषवल्याचेही पाहायला मिळाले होते. आंतर-शालेय क्रिकेट विश्वचषक अशी एक स्पर्धा दिल्लीमध्ये भरवण्यात आली होती. या स्पर्धेमध्ये इशानने त्याच्या शाळेचे कर्णधारपद भूषवले होते. पण क्रिकेटमध्ये करीअर करता यावं यासाठी इशानने शाळाही सोडली होती आणि त्यानंतर तो फक्त क्रिकेटवरच लक्ष केंद्रीत करत होता. सध्याच्या घडीला इशान हा मुंबई इंडियन्सच्या संघाला एक अविभाज्य भाग बनलेला पाहायला मिळत आहे. या हंगामात इशानने सर्वाधिक ३० षटकार लगावले होते. त्याचबरोबर मुबंईकडून खेळताना इशानने सातत्यपूर्ण फलंदाजीही केली होती. त्याचबरोबर इशान हा चांगले यष्टीरक्षणही करतो. त्यामुळे धोनीची जागा घेण्यासाठी इशान हा योग्य पर्याय आहे, असे म्हटले जात आहे. त्यामुळे आता इशानला भारतीय संघात कधी संधी मिळणार, याची उत्सुकता चाहत्यांना नक्कीच असेल. ऑस्ट्रेलियाच्या दौऱ्यासाठी मर्यादीत षटकांच्या सामन्यांसाठी लोकेश राहुलकडे यष्टीरक्षणाची जबाबदारी सोपवण्यात आली आहे. धोनीनंतर यष्टीरक्षणाची जबाबदारी रिषभ पंतकडे सोपवण्यात आली होती. पण पंत हा सातत्याने अपयशी ठरत असल्याचे आपण सर्वांनीच पाहिले आहे. त्यामुळे पंतच्या जागी आता यष्टीरक्षणाची जबाबदारी राहुलकडे सोपवण्यात आली आहे. पण राहुल किती काळ ही जबाबदारी सांभाळेल, हे सांगता येत नाही. त्यामुळे धोनीनंतर इशान किशन हा भारतीय यष्टीरक्षणासाठी चांगला पर्याय ठरू शकतो, असे सध्याच्या घडीला दिसत आहे.

from Cricket News in Marathi, क्रिकेट न्यूज़, क्रिकेट ताज्या बातम्या, Marathi Cricket News https://ift.tt/2IwiecE