अहमदाबाद, : संधी मिळाल्यावर त्याचे सोने कसे करायचे, हे सूर्यकुमार यादवने करुन दाखवले. दुसऱ्या सामन्यात सूर्यकुमारने पदार्पण केले होते, पण त्याला एकही चेंडू खेळता आला नव्हता. त्यानंतर तिसऱ्या सामन्यात त्याला वगळण्यात आले. पण आज संधी मिळाल्यावर धडाकेबाज फलंदाजी करत सूर्यकुमार यादवने अर्धशतक झळकावले. सूर्यकुमारच्या अर्धशतकाच्या जोरावर भारताला इंग्लंडपुढे १८६ धावांचे आव्हान ठेवता आले. इंग्लंडने नाणेफेक जिंकत भारताला प्रथम फलंदाजीसाठी पाचारण केले. रोहितने पहिल्याच चेंडूवर षटकार लगावत संघाला झोकात सुरुवात करुन दिली, पण रोहितला यावेळी १२ धावांवर समाधान मानावे लागले. ट्वेन्टी-२० क्रिकेटमध्ये २८०० धावा पूर्ण करण्यासाठी रोहितला यावेळी फक्त १२ धावांची गरज होती. त्याचबरोबर ट्वेन्टी-२० क्रिकेटमध्ये पहिल्याच चेंडूवर षटकार ठोकणारा तो पहिला भारतीय ठरला आहे. त्याचबरोबर ट्वेन्टी-२० क्रिकेटमध्ये रोहितने ९००० हजार धावा पूर्ण केल्या आहेत. चौथ्या सामन्यातही यावेळी लोकेश राहुल अपयशी ठरल्याचे पाहायला मिळाले. कारण राहुलला या सामन्यात १७ चेंडूंमध्ये फक्त १४ धावाच करता आल्या. त्याचबरोबर भारताचा कर्णधार विराट कोहलीही यावेळी अपयशी ठरल्याचे पाहायला मिळाले. कोहलीला यावेळी फक्त एकाच धावेवर समाधान मानावे लागले. एका बाजूने विकेट्स पडत असल्या तरी सूर्यकुमार इंग्लंडच्या गोलंदाजांचा यावेळी चांगलाच समाचार घेत होता. रिषभ पंतबरोबर सूर्यकुमारनेही यावेळी आक्रमक फलंदाजी केली. सूर्यकुमार २८ चेंडूंत आपले पहिले अर्धशतक साकारले. पण त्यानंतर मोठा फटका मारण्याच्या नादात सूर्यकुमार बाद झाला. सूर्यकुमारने यावेळी ३१ चेंडूंत सहा चौकार आणि तीन षटाकारांच्या जोरावर ५७ धावांची दमदार खेळी साकारली. सूर्यकुमार बाद होता की नाबाद, याबाबत सोशल मीडियावर चांगलीच चर्चा रंगली होती. काहींच्या मते सूर्यकुमार हा नाबाद होता आणि त्यानंतर पंचांवर जोरदार टीका करण्यात आली. सूर्यकुमार बाद झाल्यावर रिषभ पंत आणि श्रेयस अय्यर यांनी संघाला डाव सावरला. या दोघांनी चांगली फलंदाजी करत संघाचा धावफलक हलता ठेवण्याचे काम चोख बजावले.
from Cricket News in Marathi, क्रिकेट न्यूज़, क्रिकेट ताज्या बातम्या, Marathi Cricket News https://ift.tt/3cP0hB8
No comments:
Post a Comment