अहमदाबाद, : भारताचा कर्णधार विराट कोहलीवर माजी क्रिकेटपटू गौतम गंभीर चांगलाच भडकलेला आहे. कोहली प्रत्येक वेळेला विश्वचषकाच्या तयारीचे नाव घेत असत, पण त्यासाठी तो नेमकं करतोय तरी काय हेच कळत नाही. गंभीर यावेळी म्हणाला की, " सूर्यकुमार यादवला एकही चेंडू खेळू न देता संघातून बाहेर काढण्यात आले. जर एखाद्या खेळाडूला तुम्ही संधी देता तेव्हा तुम्हाला त्याला किमान ३-४ सामने खेळावायला हवेत. कारण या ३-४ सामन्यांमध्ये त्याची कामगिरी कशी होते आणि त्याला संघात कायम ठेवता येऊ शकते किंवा नाही, हे तुम्ही ठरवू शकता. जर सूर्यकुमारला तिसऱ्या सामन्यात संधी दिली असती तर तो कशी फलंदाजी करू शकतो, हे समजले असते आणि विश्वचषकासाठी त्याचा नावाचा विचार करता आला असता." गंभीर पुढे म्हणाला की, " सध्याच्या घडीला श्रेयस अय्यरला फलंदाजीमध्ये चौथे स्थान देण्यात आले आहे. पण जर तो दुखापतग्रस्त झाला तर त्याच्या जागी तुम्ही सूर्यकुमार यादवला विश्वचषकात खेळवू शकता. पण आता तर तुम्ही त्याला एकही चेंडू न खेळवता संघाबाहेर केले आहे. माझ्यामते हा निर्णय योग्य नाही. कारण विश्वचषकाची तयारी करत असताना तुम्ही खेळाडूला पारखायचे असते. पण सध्याच्या घडीला तेच भारतीय संघात होताना दिसत नाही. त्यामुळे कोहली विश्वचषकाची तयारी करत असल्याचे म्हणत असला तरी तसं काहीच दिसत नाही." तिसऱ्या ट्वेन्टी-२० सामन्यात रोहित शर्माला संघात स्थान देण्यात आले. त्यावेळी लोकेश राहुलला संघाबाहेर केले जाईल, असे वाटत होते. कारण त्यापूर्वी गेल्या दोन्ही सामन्यांमध्ये तो अपयशी ठरला होता. पण यावेळी राहुलला संघाबाहेर न काढता एकही चेंडू न खेळलेल्या सूर्यकुमारला संघाबाहेर काढण्यात आले होते. यावेळी कोहलीवर जोरदार टीकाही करण्यात आली होती. पण तिसऱ्या सामन्यात संधी मिळूनही राहुल अपयशी ठरल्याचेच पाहायला मिळाले. कारण तिसऱ्या ट्वेन्टी-२० सामन्यात राहुलला भोपळाही फोडता आला नाही. त्यामुळे आता चौथ्या सामन्यात तरी सूर्यकुमारला संधी मिळणार का, याची उत्सुकता सर्वांनाच असेल.
from Cricket News in Marathi, क्रिकेट न्यूज़, क्रिकेट ताज्या बातम्या, Marathi Cricket News https://ift.tt/3eWnIv0
No comments:
Post a Comment