अहमदाबाद, : भारत आणि इंग्लंड यांच्यातील पाचव्या आणि निर्णायक ट्वेन्टी-२० सामन्याला काही वेळातच सुरुवात होणार आहे. या सामन्यासाठी भारतीय संघ नेमका कसा असेल, हे काही वेळातच समजणार आहे. पण भारतीय संघ कसा निवडण्यात यावा, याबाबतचा सल्ला भारताचा माजी महान क्रिकेटपटू सचिन तेंडुलकरने कर्णधार विराट कोहलीला दिला आहे. सचिनने एएनआइला दिलेल्या मुलाखतीमध्ये सांगितले की, " भारतीय संघात फक्त युवा खेळाडूंनाच संधी द्यावी, असा विचार करता कामा नये. कारण यावेळी युवा खेळाडूंपेक्षा आपल्याला सर्वोत्तम भारतीय संघ कसा निवडता येईल, याकडे लक्ष द्यायला हवे. जेव्हा तुम्ही भारतीय संघाचा विचार करता तेव्हा त्यासाठी वय हा निकष लावता कामा नये. कारण तुम्हाला मैदानात आपला खेळ दाखवायचा असतो आणि त्यासाठी वयाची मर्यादा नसते." गेल्या काही दिवसांमध्ये भारतीय संघाच्या निवडीवर बरेच प्रश्नचिन्ह उपस्थित राहत आहेत. काही खेळाडूंकडून चांगली कामगिरी होत नसतानाही त्यांना संघात कायम ठेवले जात आहे. त्याचबरोबर काही खेळाडूंना फक्त १-२ सामने खेळवून विश्रांती दिली जात आहे. या सर्व प्रकारावर चाहतेही नाराज असल्याचे समजते आहे. सोशल मीडियाच्या माध्यमातून चाहत्यांनी आपली नाराजी व्यक्तही केली आहे. त्याचबरोबर काही माजी क्रिकेटपटूंनीही याबाबत भाष्य केले आहे. सचिनने यावेळी विराटला संघ निवडीबाबत सल्ला दिला आहे, पण कोहली त्याची गोष्ट किती मनावर घेतो आणि संघात बदल करतो, याची उत्सुकता सर्वांनाच असेल. भारताच्या संघ निवडीबाबत सचिन पुढे म्हणाला की, " युवा खेळाडूंना आपली कामगिरी दाखवण्यासाठी नक्कीच संधी मिळायला पाहिजे, यावर कोणाचेही दुमत नाही. पण जर कोणी चांगली कामगिरी करु शकत नसेल तर त्याला संघात घेण्याबाबत विचार करायला नको. कारण युवा खेळाडूंनाच प्राधान्य द्यायला हवे, ही गोष्ट माझ्यामते चुकीची आहे. ही एक चुकीची समजूत आहे, असे मला तरी वाटते. मला असे वाटते की, तुम्ही तुमचे सर्वोत्तम ११ खेळाडू निवडायला हवेत. तुम्ही १४-१५ खेळाडूंची निवड करा आणि त्याचे योग्य संतुलन कसे राखायचे हे निवड समितीवर सोडून द्यायला हवे."
from Cricket News in Marathi, क्रिकेट न्यूज़, क्रिकेट ताज्या बातम्या, Marathi Cricket News https://ift.tt/3fbMyrh
No comments:
Post a Comment