अहमदाबाद, : रोहित शर्मा आणि सूर्यकुमार यादव यांच्याबाबतचा एक योगायोग आता समोर आला आहे. रोहित आणि सूर्यकुमार यांच्या ट्वेन्टी-२० कारकिर्दीवर लक्ष टाकले तर ही गोष्ट सर्वांना समजता येऊ शकते. रोहित शर्माने ट्वेन्टी-२० क्रिकेटमध्ये १९ सप्टेंबर २००७ साली पदार्पण केले होते. हा सामना ट्वेन्टी-२० विश्वचषकातील होता आणि तो दक्षिण आफ्रिकेतील दरबान येथे खेळवण्यात आला होता. पण या पहिल्या सामन्यात रोहित शर्माला फलंदाजी करण्याची संधी मिळाली नव्हती. त्यानंतर भारताचा या विश्वचषकातील दुसरा सामना हा यजमान दक्षिण आफ्रिकेविरुद्ध खेळवण्यात आला होता. पहिल्या सामन्यात एकही चेंडू न खेळलेल्या रोहित शर्माने दुसऱ्या सामन्यात अर्धशतक साकारले होते. रोहितने या सामन्यात नाबाद ५० धावा केल्या होत्या. हाच योगायोग सूर्यकुमारच्या बाबतीतही पाहायला मिळाला आहे. सध्या सुरु असलेल्या इंग्लंडविरुद्धच्या मालिकेत सूर्यकुमारला पदार्पणाची संधी देण्यात आली. पण पदार्पणाच्या सामन्यात सूर्यकुमारला एकही चेंडू खेळता आला नाही. त्यानंतच्या सामन्यात सूर्यकुमारला संघाबाहेर काढण्यात आले होते. पण चौथ्या ट्वेन्टी-२० सामन्यात संधी मिळाल्यावर सूर्यकुमारने अर्धशतक झळकावले. भारताकडून पहिल्यांदाच फलंदाजीला उतरल्यावर रोहित आणि सूर्यकुमार यांनी अर्धशतके झळकावली असून हेच त्यांच्यामधील साम्य आता पुढे आले आहे. सूर्यकुमारने आपल्या दुसऱ्या सामन्यात ५७ धावांची खेळी साकारली होती. मुंबई इंडियन्सने याबाबतचे ट्विट करत सर्वांना माहिती दिली होती. सूर्यकुमार यादवने षटकारासह इंग्लंडविरुद्धच्या चौथ्या ट्वेन्टी-२० सामन्यात आपल्या डावाची सुरुवात केली होती. त्याबाबत सूर्यकुमार म्हणाला की, " ज्यापद्धतीने मी खेळी साकारली, त्याबद्दल मी नक्कीच आनंदी आहे. जेव्हा मी फलंदाजीसाठी गेलो तेव्हा मला नेमकं काय कराचे आहे, हे माझ्या मनात स्पष्ट होते. माझी योजना तयार झालेली होती. मी जोफ्रा आर्चरला आयपीएलच्या गेल्या २-३ सत्रांमध्ये पाहत आलो आहे, त्याचबरोबर मी आर्चरच्या सर्व मॅचेस पाहिल्या आहेत. जेव्हा एखादा नवीन खेळाडू फलंदाजीसाठी येतो, तेव्हा त्याच्याकडे काही तरी योजना असते."
from Cricket News in Marathi, क्रिकेट न्यूज़, क्रिकेट ताज्या बातम्या, Marathi Cricket News https://ift.tt/3tCKHzG
No comments:
Post a Comment