'महेंद्रसिंग धोनीला संघात ठेवले तर चेन्नईला होऊ शकते मोठे नुकसान'

नवी दिल्ली : आयपीएलमध्ये यावर्षी चेन्नई सुपर किंग्स संघाला लौकिकाला साजेशी कामगिरी करता आली नाही. त्यामुळेच आता चेन्नईचा कर्णधार महेंद्रसिंग धोनी आयपीएल खेळणार की नाही, अशी चर्चा सुरु झाली होती. पण जर चेन्नईच्या संघाने धोनीला संघात कायम ठेवले तर त्यांना मोठे नुकसान होऊ शकते, असे वक्तव्य भारताच्या एका माजी क्रिकेटपटूने केले आहे. पुढच्या वर्षी आयपीएलपूर्वी खेळाडूंचा लिलाव होणार आहे. त्यावेळी चेन्नईचा संघ नेमका काय करतो, यावर सर्वांचे लक्ष असेल. कारण चेन्नईच्या संघातील बरेच खेळाडू आता निवृत्तीच्या वाटेवर आहेत, ते पुढची आयपीएल खेळू शकणार की नाही, याबाबत संभ्रम आहे. त्यामुळे चेन्नईच्या संघाला पुढच्या वर्षीच्या आयपीएलसाठी नव्याने संघ बांधणी करावी लागणार आहे. भारताचा माजी क्रिकेटपटू आणि समालोचक आकाश चोप्राने यावेळी सांगितले आहे की, " पुढच्या वर्षीच्या आयपीएलसाठी जेव्हा खेळाडूंचा लिलाव होईल, तेव्हा चेन्नईच्या संघाने धोनीला संघात कायम ठेवू नये. कारण धोनीला संघात कायम ठेवले तर त्यांचे १५ कोटी रुपये अडकून राहतील. त्याचबरोबर यावेळी जर मोठा लिलाव झाला तर चेन्नईच्या संघाला तीन वर्षे नवीन खेळाडू मिळू शकणार नाहीत. धोनी यापुढे तीन वर्षे आयपीएल खेळेल असे वाटत नाही. त्यामुळे चेन्नईच्या संघाने धोनीला संघात कायम ठेवले तर त्यांचे मोठे आर्थिक नुकसान होऊ शकते." आकाश पुढे म्हणाला की, " चेन्नईच्या संघाला धोनीला संघात कायम ठेवायचे असेल, तर ते एक गोष्ट करू शकतात. आयपीएलच्या लिलावाच्यावेळी त्यांनी धोनीला संघात कायम ठेवू नये. त्यामुळे त्यांचे १५ कोटी रुपये वाचू शकतात. त्यानंतर त्यांनी राइट टू मॅच हे कार्ड वापरून धोनीला पुन्हा आपल्या संघात घ्यावे, जेणेकरून चेन्नईच्या संघाचे पैसेही वाचतील आणि त्यांना चांगला संघही बांधता येऊ शकतो. त्यामुळे चेन्नईच्या संघाने यावर्षी जर मोठा लिलाव होणार असेल तर धोनीला आपल्या संघात कायम ठेवू नये."

from Cricket News in Marathi, क्रिकेट न्यूज़, क्रिकेट ताज्या बातम्या, Marathi Cricket News https://ift.tt/3kA2oux