चेन्नई : भारताचा वेगवान गोलंदाज जसप्रीत बुमराने चेन्नईमध्ये सराव करत असताना भारताचे माजी महान फिरकीपटू अनिल कुंबळे यांच्या गोलंदाजीची नक्कल केल्याचे पाहायला मिळाले. बुमराचा हा व्हिडीओ सध्याच्या घडीला चांगलाच व्हायरल झाला आहे. बुमहा आपल्या वेगवान गोलंदाजीसाठी जगप्रसिद्ध आहे. पण भारतीय संघाच्या नेट्समध्ये मात्र कुंबळे यांच्या गोलंदाजीची नक्कल करत असल्याचे पाहायला मिळाले आहे. बीसीसीआयनेच बुमराचा हा व्हिडीओ सोशल मीडियावर शेअर केला आहे आणि त्याला भन्नाट प्रतिसादही मिळाला आहे. बुमराचा हा व्हिडीओ पाहून कुंबळे यांनी आपली प्रतिक्रीयाही दिली आहे. बुमराचा व्हिडीओ पाहिल्यावर कुंबळे यांनी म्हटले आहे की, " वेल डन बुमरा. तु माझ्या गोलंदाजी शैलीच्या फार जवळ गेला आहेस. पुढच्या पिढीच्या वेगवान गोलंदाजांसाठी तु एक प्रेरणास्थान आहेस. युवा पिढीतील बरेच जण तुझ्या गोलंदाजीचीही नक्कल करत असल्याचे पाहायला मिळते. आगामी मालिकांसाठी तुला शुभेच्छा..." भारताकडून सर्वाधिक कसोटी आणि एकदिवसीय क्रिकेटमध्ये विकेट्स मिळवण्याचा मान कुंबळे यांच्या नावावर आहे. २००८ साली कुंबळे यांनी आंतरराष्ट्रीय क्रिकेटमधून निवृत्ती घेतली होती. कुंबळे यांच्या नावावर ६१९ कसोटी विकेट्स आहेत. निवृत्तीनंतर कुंबळे यांनी भारतीय संघाचे प्रशिक्षकपदही भूषवले होते. भारत आणि इंग्लंड यांच्यामध्ये ५ फेब्रुवारीपासून कसोटी मालिकेला सुरुवात होणार आहे. भारतीय संघ ऑस्ट्रेलियातील विजयानंतर आता आपल्याच मैदानात इंग्लंडबरोबर दोन हात करणार आहे. पण यावेळी भारतीय संघाचे कर्णधारपद अजिंककडे नसून ते विराट कोहलीकडे देण्यात आले आहे. या मालिकेत अजिंक्य हा भारतीय संघाचा उपकर्णधार असेल. भारत आणि इंग्लंड यांच्यातील कसोटी मालिका सुरु होण्यापूर्वीच चाहत्यांसाठी एक आनंदाची बातमी आली आहे. चाहत्यांना चेन्नईतील दोन्ही कसोटी सामने आता लाइव्ह पाहाता येणार आहेत. करोनानंतर भारतामध्ये पहिल्यांदाच प्रेक्षकांना हे सामने स्टेडियममध्ये जाऊन पाहता येणार आहेत. त्यामुळे आता चाहत्यांचा या कसोटी सामन्यांना कसा प्रतिसाद मिळतो, याकडे सर्वांचे लक्ष असणार आहे.
from Cricket News in Marathi, क्रिकेट न्यूज़, क्रिकेट ताज्या बातम्या, Marathi Cricket News https://ift.tt/3oDSJoM
No comments:
Post a Comment