नवी दिल्ली : करोनाचा सर्वात मोठा धक्का आता क्रिकेट विश्वाला बसल्याचे पाहायला मिळत आहे. कारण करोनामुळे आता क्रिकेटची मालिकाच रद्द करण्याचा निर्णय घेण्यात आला आहे. दोन्ही देशांच्या क्रिकेट मंडळांनी हा निर्णय घेतला असून आता यापुढे हे सामने कधी खेळवायचे, याबाबतचा निर्णय मात्र अद्याप होऊ शकलेला नाही. दोन्ही संघ ज्या हॉटेलमध्ये होते तेथील कर्मचाऱ्यांना करोनाची लागण झाली होती. हॉटेलमधील दोन कर्मचाऱ्यांची करोना चाचणी पॉझिटिव्ह आली. त्याआधी इंग्लंडचे खेळाडू आणि अन्य कर्मचारी यांची शनिवारी रात्री पीसीआर टेस्ट झाली होती. त्यामुळे इंग्लंड आणि दक्षिण आफ्रिका यांच्यातील पहिला एकदिवसीय सामना रविवारी पुढे ढकलण्यात आला होता. पण त्यानंतर रविवारीही हा सामना होऊ शकला नव्हता आणि करोनामुळे एकच सामना दोनवेळा रद्द करण्याची वेळ आली होती. पण आता तर ही संपूर्ण मालिकाच रद्द करण्याचा निर्णय घेण्यात आला आहे. दक्षिण आप्रिका आणि इंग्लंड यांच्यातील संपूर्ण मालिकेत करोना व्हायरसची चर्चा आहे. टी-२० मालिकेआधी आफ्रिकेच्या संघातील काही खेळाडूंना करोनाची लागण झाल्याचे समोर आले होते. पण त्यानंतर देखील मालिका खेळवण्यात आली होती. इंग्लंडने तेव्हा ३-० असा विजय मिळवला. त्यानंतर वनडे मालिकेच्या आधी दोन्ही संघातील एक सदस्याला करोनाची लागण झाल्याचे समोर आले. त्यामुळे केपटाउन येथील वनडे स्थगित करण्यात आली. आता पुन्हा करोनामुळे सामनाच रद्द करण्याची वेळ आली. याबाबत इंग्लंडच्या क्रिकेट संघटनेचे मुख्य कार्यकारी अधिकारी टॉम हॅरिसन यांनी सांगितले की, " आमच्या क्रिकेट मंडळासाठी खेळाडू आणि सपोर्ट स्टाफची सुरक्षा सर्वात महत्वाची आहे. दक्षिण आफ्रिकेच्या दौऱ्यावर आल्यावर काही गोष्टींमुळे आम्हाला चिंता नक्कीच होती. पण एवढी गंभीर अवस्था त्यावेळी नव्हती. पण सातत्याने या गोष्टी पाहायला मिळत असल्यामुळे खेळाडूंच्या सुरक्षेसाठी इंग्लंड आणि दक्षिण आफ्रिका या दोन्ही क्रिकेट मंडळांनी मालिका रद्द करण्याचा निर्णय घेतला आहे." टॉम पुढे म्हणाले की, " इंग्लंड आणि दक्षिण आफ्रिका या दोन्ही संघांतील काही खेळाडू हे करोना पॉझिटीव्ह आढळले होते. त्याचबरोबर हॉटेलमधील स्टाफच्या काही व्यक्तींनाही करोना झाला होता. त्यामुळे आम्ही दोन्ही क्रिकेट मंडळानी एकत्र येऊन मालिका रद्द करण्याचा निर्णय घेतला आहे. ही गोष्ट समजून घेऊन त्याबाबत समर्थन दिल्याबद्दल आम्ही दक्षिण आफ्रिकेच्या क्रिकेट मंडळाचे आभारी आहोत. आता ही रद्द झालेली मालिका कधी खेळवण्यात येईल, याबाबतचा निर्णय अद्याप झालेला नाही. पण दोन्ही क्रिकेट मंडळांमध्ये चर्चा करूनच हा निर्णय घेण्यात येईल."
from Cricket News in Marathi, क्रिकेट न्यूज़, क्रिकेट ताज्या बातम्या, Marathi Cricket News https://ift.tt/3qBaB64
No comments:
Post a Comment