नवी दिल्ली : पुढच्या वर्षी आयपीएलमध्ये दोन नवीन संघांची एंट्री होऊ शकते, असे काही दिवसांपूर्वी ऐकायला मिळत होते. त्याचबरोबर पुढच्या वर्षी मोठा लिलाव होणार आहे, असेही म्हटले जात होते. पण पुढच्या वर्षी आयपीएलमध्ये नेमके किती संघ खेळवायचे, यावर बीसीसीआयने आपला निर्णय घेतला आहे. बीसीसीआयची २४ डिसेंबरला वार्षिक सर्वसाधारण सभा होणार आहे. या बैठकीमध्ये या निर्णयावर शिक्कामोर्तब होणार आहे. इनसाइड स्‍पोर्टने दिलेल्या माहितीनुसार बीसीसीआयच्या एका अधिकाऱ्याने सांगितले की, " सध्याच्या घडीला तरी बीसीसीआय मोठा लिलाव करण्याच्या स्थितीमध्ये नाही. त्यामुळे पुढच्या वर्षी मिनी लिलाव करण्यात येणार आहे. त्याचबरोबर लिलावाची तारीख लवकरच ठरवण्यात येणार आहे. पण आतापर्यंत मिळालेल्या माहितीनुसार फेब्रुवारी महिन्यात आयपीएलचा लिलाव होणार असल्याचे समजते आहे." बीसीसीआयच्या अधिकाऱ्यांनी दिलेल्या माहितीनुसार पुढच्या वर्षी आयपीएलमध्ये दोन संघांची एंट्री होणार नाही. कारण जर दोन संघांची एंट्री झाली असती तर बीसीसीआयला मोठा लिलाव करावा लागला असता. त्यामुळे आता २०२२ साली आयपीएलमध्ये नवीन दोन संघांची एंट्री होऊ शकते, असे म्हटले जात आहे. त्यामुळे आता पुढच्या वर्षी संघांमध्ये मोठे बदल झालेले पाहायला मिळणार नाही. करोनानंतर भारतामध्ये पहिल्यांदाच सय्यद मुश्ताक अली ट्वेन्टी-२० स्पर्धा होणार आहे. ही स्पर्धा १० ते ३१ जानेवारी या कालावधीमध्ये खेळवण्यात येणार आहे. या स्पर्धेसाठी खेळाडूंना स्पर्धेच्या ठिकाणी २ जानेवारीपर्यंत पोहोचायचे आहे. बीसीसीआयने स्पर्धेसाठी सहा केंद्र बनवली आहेत, या केंद्रांमध्ये खेळाडूंना २ जानेवारीपर्यंत पोहोचायचे असून त्यानंतर ही स्पर्धा सुरु करण्यात येणार आहे. बीसीसीआयचे सचिव जय शहा यांनी आज सर्व राज्य संघटनांना या स्पर्धेबाबत इमेल द्वारे माहिती दिली. त्यानंतर सर्व राज्य संघटना याबाबत आपले मत व्यक्त करणार आहे. त्यानंतर या स्पर्धेचे वेळापत्रक जाहीर करण्यात येणार आहे. बीसीसीआयने सय्यद मुश्ताक अली ट्वेन्टी-२० स्पर्धा प्रथम खेळवण्याचा निर्णय घेतला आहे. पण अद्याप रणजी करंडक क्रिकेट स्पर्धेबाबत कोणताही निर्णय घेण्यात आलेला नाही. या स्पर्धेच्या आयोजनानंतर रणजी करडंक क्रिकेट स्पर्धेच्या आयोजनाचा विचार केला जाऊ शकतो, असे म्हटले जात आहे.
from Cricket News in Marathi, क्रिकेट न्यूज़, क्रिकेट ताज्या बातम्या, Marathi Cricket News https://ift.tt/3perCRT
No comments:
Post a Comment