IND vs AUS : अश्विनवर भारतीय संघात का होतोय अन्याय, सुनील गावस्कर यांनी केला मोठा खुलासा

मेलबर्न, : भारतीय संघात अनुभवी फिरकीपटू आर. अश्विनवर अन्याय का होत आहे, याबाबतचा खुलासा आता भारताचे माजी कर्णधार आणि समालोचक सुनील गावस्कर यांनी केला आहे. अश्विनला २०१७ पासून एकही एकदिवसीय किंवा ट्वेन्टी-२० सामन्यात संधी का देण्यात आली नाही, याचे उत्तर गावस्कर यांनी दिले आहे. गावस्कर याबाबत म्हणाले की, " कोणताही संघ एका अशा खेळाडूचे नक्कीच स्वागत करेल की ज्याने ३५० विकेट्स मिळवले आहेत आणि चार शतकेही लगावलेली आहेत. पण भारतीय संघात मात्र तसे होताना दिसत नाही. कारण अश्विनकडे आंतरराष्ट्रीय क्रिकेटचा चांगला अनुभव आहे. पण त्याच्यावर संघात अन्याय होत आहे. कारण अश्विनने बऱ्यापैकी कामगिरी केली तरी त्याला संघातून बाहेरचा रस्ता दाखवला जातो, पण दुसरीकडे जो फलंदाज नापास ठरतो त्याला मात्र संघात कायम ठेवले जाते. त्यामुळे अश्विनच्याबाबतीत हा वेगळा न्याय का लावला जातो, हे कळत नाही." अश्विनवर का अन्याय केला जातो, पाहा... गावस्कर यांनी अश्विनवर नेमका का अन्याय केला जातो, याबाबत आपले मत व्यक्त केले आहे. गावस्कर म्हणाले की, " अश्विनला कामगिरीमुळे नाही तर तो संघाच्या बैठकीमध्ये आपले विचार स्पष्टपणे व्यक्त करतो, त्यामुळे त्याला संघाबाहेर बसवले जाते. जर अश्विनसारखा अनुभवी खेळाडू आपले मत व्यक्त करत असेल किंवा कोणता सल्ला देत असेल तर त्याचे स्वागत करायला हवे. पण भारतीय संघात मात्र तसे होताना दिसत नाही. कारण अश्विन संघाच्या बैठकीमध्ये आपले मत व्यक्त करतो आणि त्यामुळेच त्याला संघाबाहेर केले जाते. पण जो फलंदाज अपयशी ठरतो, त्याला मात्र हा न्याय लावला जात नाही." कोहलीबाबत गावस्कर काय म्हणाले, पाहा...सध्या कोहली ऑस्ट्रेलियाविरुद्धचा फक्त एकच कसोटी सामना खेळून भारतासाठी रवाना झाला आहे. कोहलीच्या घरी जानेवारी महिन्यामध्ये पाळणा हलणार आहे. त्यासाठी कोहली भारतीय संघाचा दौरा अर्ध्यावर टाकून मायदेशी रवाना झाला आहे. पण भारतीय संघातील अजून एका खेळाडूच्या घरी पाळणा हलला होता, त्याला काही नाही भारतामध्ये पाठवण्यात आले, असा सवाल गावस्कर यांनी यावेळी उपस्थित केला आहे. ज्या खेळाडूच्या घरी आयपीएल खेळतानाच पाळणा हलला त्याला थेट जानेवारीला आपल्या मुलीला भेटता येणार आहे, ही बाबही गावस्कर यांनी प्रकर्षाने पुढे आणली आहे. गावस्कर यावेळी म्हणाले की, " संघातील काही खेळाडूंना नियम माहिती नसतात, तर काही खेळाडू नवीन असल्यामुळे काही गोष्टींची मागणी करत नाही. मी भारताचा वेगवान गोलंदाज टी. नटराजनबद्दल बोलत आहे. आयपीएलचे प्ले-ऑफचे सामने सुरु होते तेव्हा नटराजनच्या घरी पाळणा हलला होता. त्यानंतर नेट्समध्ये सराव करणाऱ्या गोलंदाजांमध्ये त्याचा भारतीय संघात समावेश करण्यात आला होता. पण त्याला भारतामध्ये आपला नवजात मुलीला भेटायला पाठवण्यात आले नाही, हा कोणता न्याय आहे." त्याचबरोबर गावस्कर यांनी अजून काही प्रश्न उपस्थित केले आहेत. गावस्कर यावेळी म्हणाले की, " नटराजनला आयपीएल खेळत असताना मुलगी झाल्याची आनंदाची बातमी मिळाली होती. पण तो नेट बॉलर असला तरी त्याला ऑस्ट्रेलिमध्ये थेट नेण्यात आले. त्यानंतर नटराजनला ट्वेन्टी-२० मालिकेत खेळवण्यात आले आणि त्याला कसोटी मालिकेसाठी संघात स्थान देण्यात आले नसले तरी त्याला ऑस्ट्रेलियामध्येच ठेवण्यात आले आहे. त्यामुळे आता नटराजनला आपल्या मुलीला थेट जानेवारी महिन्याच्या तिसऱ्या आठवड्यात भेटता येऊ शकते. पण दुसरीकडे संघातील महत्वाचा खेळाडू, कर्णधार आपल्या बाळाचा जन्म होणार म्हणून दौरा अर्धवट सोडून मायदेशी परतला आहे, यालाच म्हणतात भारतीय क्रिकेट..."

from Cricket News in Marathi, क्रिकेट न्यूज़, क्रिकेट ताज्या बातम्या, Marathi Cricket News https://ift.tt/3hh1wLs