चेन्नई, : इंग्लंडचा कर्णधार जो रुट आज आपला शंभरावा कसोटी सामना खेळत आहे. त्यामुळे सामना सुरु होण्यापूर्वी रुटचा सत्कार करण्यात आला. पण शंभरावा कसोटी सामना खेळत असताना रुटने एक अनोखा विश्वविक्रम रचला आहे. आतापर्यंत क्रिकेट विश्वात ही गोष्ट कोणत्याही क्रिकेटपटूला करता आलेली नाही. रुट हा जगातील असा एकच क्रिकेटपटू आहे की, ज्याचे सर्व महत्वाचे सामने हे भारतात खेळले गेले. रुटने २०१२ साली आंतरराष्ट्रीय क्रिकेटमध्ये पदार्पण नागपूरमध्ये केले होते. या सामन्यात रुटने ७३ धावांची खेळी साकारली होती. त्यानंतर रुट आपला ५०वा सामनाही भारतामध्येच खेळला. २०१६ साली रुट आपला ५०वा सामना विशाखापट्टणम येथे खेळला होता. त्यानंतर आता आपला शंभरावा कसोटी सामना रुट चेन्नईमध्ये खेळत आहे. या सामन्यातील पहिल्या डावात रुटने आतापर्यंत आपले अर्धशतक साजरे केले आहे. पण भारतामध्ये पहिला, ५०वा आणि शंभरावा कसोटी सामना खेळणारा रुट हा क्रिकेट विश्वातील पहिलाच परदेशी खेळाडू ठरला आहे. परदेशात आपला पहिला आणि शंभरावा कसोटी सामना खेळणारा रुट हा जगातील तिसरा खेळाडू ठरला आहे. यापूर्वी भारताचे माजी विश्वविजेते कर्णधार कपिल देव यांनी आपला पहिला आणि शंभरावा कसोटी सामना पाकिस्तानमध्ये खेळला होता. त्यानंतर वेस्ट इंडिजचा माजी कर्णधार कार्ल हुपरने आपला पहिला आणि शंभरावा कसोटी सामना भारतामध्ये खेळला होता. त्यानंतर या यादीमध्ये रुटचा तिसरा क्रमांक लागत आहे. सर्वात कमी वयात शंभर कसोटी सामने खेळणाऱ्या खेळाडूंच्या यादीतही आता रुटचा समावेश झाला आहे. रुट आपला शंभरावा कसोटी सामना हा २९ वर्षे आणि १३४ दिवसांमध्ये खेळत आहे. या यादीत पहिल्या स्थानावर इंग्लंडचा माजी कर्णधार अॅलिस्टर कुकचा समावेश आहे. कुकने २८ वर्षे आणि ३५३ दिवसांमध्ये आपला शंभरावा कसोटी सामना खेळला होता. त्यानंतर या यादीत दुसऱ्या क्रमांकावर भारताचा माजी महान क्रिकेटपटू सचिन तेंडुलकर आहे. सचिनने आपला शंभरवा कसोटी सामना २९ वर्षे आणि १३४ दिवसांमध्ये खेळला होता.
from Cricket News in Marathi, क्रिकेट न्यूज़, क्रिकेट ताज्या बातम्या, Marathi Cricket News https://ift.tt/3pQE1MR
No comments:
Post a Comment