चेन्नई : काही दिवसांपूर्वी दिल्ली कॅपिटल्सच्या संघाने रिषभ पंतला कर्णधारपद दिले. त्यानंतर आयपीएलमधील सर्वात युवा कर्णधार कोण, याची जोरदार चर्चा सुरु झाली आहे. काही जणांना रिषभ पंत हा सर्वात युवा कर्णधार असल्याचे वाटत आहे. पण आता आयपीएलमध्ये सर्वात कमी वयात कोणत्या खेळाडूने कर्णधारपद सांभाळले, याची यादी जाहीर झाली आहे. रिषभ पंतला जेव्हा दिल्लीच्या संघाने कर्णधारपद दिले तेव्हा त्याचे वय २३ वर्षे आणि ६ महिने एवढे आहे. दिल्लीने भविष्याचा विचार करुन यावेळी पंतला कर्णधार बनवले आहे. पंतने २४ व्या वर्षी दिल्लीचे कर्णधारपद स्विकारले आहे. पण आयपीएलच्या इतिहासामध्ये सर्वात कमी वयात कर्णधारपद निभावण्याचा मान दुसऱ्या खेळाडूला मिळाला असून पंत या यादीमध्ये पाचव्या स्थानावर आहे. आयपीएलमध्ये सर्वात कमी वयात कर्णधारपदी माळ पडली ती विराट कोहलीच्या गळ्यात. आरसीबीच्या संघाने जेव्हा विराटला कर्णधार बनवले होते तेव्हा त्याचे वय २२ वर्षे आणि ६ महिने एवढे होते. त्यानंतर आतापर्यंत कोहलीच आरसीबीचा कर्णधार असल्याचे पाहायला मिळाले आहे. पण कोहलीच्या नेतृत्वाखाली आरसीबीला आतापर्यंत एकदाही जेतेपद पटकावता आलेले नाही. कोहलीनंतर यादीमध्ये दुसरा क्रमांक लागतो तो स्टीव्हन स्मिथचा. आयपीएलचे कर्णधारपद स्मिथला २२ वर्षे आणि ११ महिने एवढे वय असताना मिळाले. होते. स्मिथने चांगले नेतृत्व केले असले तरी त्यालाही आपल्या संघाला एकदाही जेतेपद पटकावून देता आले नाही. त्यानंतर या यादीमध्ये तिसरा क्रमांक लागतो तो सुरेश रैनाचा. रैनाला आयपीएलमध्ये पहिल्यांदा नेतृत्व करण्यााची संधी मिळाली तेव्हा रैनाचे वय २३ वर्षे आणि ३ महिने एवढे होते. पण जास्त काळ रैनाला संघाचे नेतृत्व करता आले नाही. या यादीमध्ये चौथ्या क्रमांकावर आहे तो श्रेयस अय्यर. श्रेयसने जेव्हा पहिल्यांदा कर्णधारपद स्विकारले होते तेव्हा त्याचे वय २३ वर्षे आणि ४ महिने एवढे होते. श्रेयस दुखापतग्रस्त झाल्यामुळेच आता रिषभ पंतला दिल्लीच्या संघाचे कर्णधारपद मिळाले आहे आणि या यादीमध्ये तो पाचव्या स्थानावर आहे.
from Cricket News in Marathi, क्रिकेट न्यूज़, क्रिकेट ताज्या बातम्या, Marathi Cricket News https://ift.tt/3fy6CEk
No comments:
Post a Comment