मुंबई : देवदत्त पडीक्कलच्या नाबाद शतकाच्या जोरावर आरसीबीने आजच्या सामन्यात राजस्थान रॉयल्सवर १० विकेट्स राखून विजय साकारला. या विजयासह आरसीबीने धोनीच्या नेतृत्वाखालील चेन्नई सुपर किंग्सला गुणतालिकेत जोरदार धक्का दिल्याचे पाहायला मिळाले. या सामन्यापूर्वीच तीन विजयांसह आरसीबीचा संघ हा गुणतालिकेत दुसऱ्या स्थानावर होता. चेन्नई आणि आरसीबी या दोन्ही संघांचे समान गुण होते, पण नेट रनरेट जास्त असल्यामुळे चेन्नईचा संघ अव्वल स्थानावर पोहोचला होता. आजच्या सामन्यात आरसीबीने विजय मिळवला. हा आरसीबीचा चौथा विजय ठरला आणि त्याचबरोबर गुणतालिकेत आठ गुण कमावणारा आरसीबी हा पहिला संघ ठरला आहे. आठ गुणांसह आरसीबीच्या संघाने गुणतालिकेत अव्वल स्थान पटकावले आहे. राजस्थानने यावेळी आरसीबीपुढे विजयासाठी १७८ धावांचे आव्हान ठेवले होते. या आव्हानाचा पाठलाग करताना आरसीबीने एकही विकेट गमावला नाही. देवदत्त पडीक्कलने यावेळी धडाकेबाज शतक साकारले, त्याला यावेळी कोहलीने चांगली साथ दिली. पडीक्कलने यावेळी ५२ चेंडूंत ११ चौकार आणि सहा षटकारांच्या जोरावर नाबाद १०१ धावांची खेळी साकारली. कोहलीने यावेळी ४७ चेंडूंत सहा चौकार आणि तीन षटकारांच्या जोरावर नाबाद ७२ धावा केल्या. राजस्थानच्या संघाने प्रथम फलंदाजी केली, पण त्यांच्या फलंदाजांना यावेळी सूर गवसला नाही. राजस्थानची ३ बाद १८ अशी दयनीय अवस्था झाली होती. त्यानंतर संजू सॅमसनने काही काळ धडाकेबाज फलंदाजी केली खरी, पण षटकार ठोकल्यानंतर वॉशिंग्टन सुंदरच्या दुसऱ्याच चेंडूवर तो बाद झाला. संजूने यावेळी दोन चौकार आणि एका षटकाराच्या जोरावर २१ धावा केल्या. शिवम दुबे आणि रायन पराग यांची चांगली भागीदारी झाल्याचे पाहायला मिळाले. या दोघांनी यावेळी पाचव्या विकेटसाठी ६६ धावांची भागीदारी रचली. पण यावेळी पराग २५ धावांवर आऊट झाला आणि ही त्यांची भागीदारी संपुष्टात आली. पराग बाद झाला असला तरी शिवम चांगली फटकेबाजी करत होता. पण यावेळी शिवमचे अर्धशतक फक्त चार धावांनी हुकले. शिवमला यावेळी केन रीचर्डसनने बाद केले. शिवमने यावेळी ३२ चेंडूंत पाच चौकार आणि दोन षटकारांच्या जोरावर ४६ धावा केल्या. त्यानंतर राहुल तेवातियाने यावेळी २३ चेंडूंत ४० धावा केल्यामुळे राजस्थानला १७७ धावा करता आल्या.
from Cricket News in Marathi, क्रिकेट न्यूज़, क्रिकेट ताज्या बातम्या, Marathi Cricket News https://ift.tt/2QMsodd
No comments:
Post a Comment