चेन्नई : पृथ्वी शॉ याला दिल्ली कॅपिटल्सच्या संघाने गेल्यावर्षी संघाबाहेर काढले होते. आयपीएलच्या अंतिम फेरीत दिल्लीचा संघ पोहोचला असला तरी पृथ्वीला संघात स्थान देण्यात आले नव्हते. त्यानंतर भारतीय संघाकडूनही पृथ्वीला डच्चू देण्यात आला आणि सध्याच्या घडीला तो भारतीय संघातही नाही. या सर्व गोष्टीला पृथ्वीची एक वाईट सवय जबाबदार आहे, असा मोठा खुलासा दिल्ली कॅपिटल्सचा मुख्य प्रशिक्षक रिकी पॉन्टिंगने केला आहे. पॉन्टिंग यावेळी म्हणाला की, " पृथ्वीची बॅटिंग करण्याची थिअरी नेमकी काय आहे, हेच कळत नाही. जेव्हा पृथ्वीकडून धावा होत नसतात तेव्हा तो फलंदाजीचा सरावच करत नाही. पण जेव्हा त्याच्याकडून चांगल्या धावा होत असतात तेव्हा तो सर्वाधिक काळ फलंदाजीचा सराव करत असतो. पण जेव्हा धावा होत नसतात, तेव्हा फलंदाजीचा सराव न करणे, ही चांगली गोष्ट नाही. त्यामुळे पृथ्वीने त्याची ही सवय बदलायला हवी." पॉन्टिंगने पुढे सांगितलं की, " गेल्यावर्षी झालेल्या आयपीएलमध्ये ४-५ सामन्यांमध्ये पृथ्वीला दहापेक्षा जास्त धावा करता आल्या नव्हत्या. त्यावेळी मी त्याला सांगितलं होतं की, आपल्या नेट्समध्ये सराव करायला जाऊया. त्यावेळी पृथ्वीने मला नकार दिला आणि मी आज फलंदाजीचा सराव करणार नसल्याचे त्याने मला सांगितले. मला ही गोष्ट नेमकी काय आहे, ती समजलीच नाही. पण पृथ्वीने त्याची ही सवय नक्कीच बदलायला हवी. जर त्याने ही सवय बदलली नाही तर त्याचेच नुसकान होऊ शकते." पृथ्वी शॉमध्ये झाला हा महत्वाचा बदल...पृथ्वीमध्ये आता नेमका कोणता बदल झाला आहे, याबाबत पॉन्टिंग म्हणाला की, " पृथ्वीमध्ये आता काही बदल झालेला मला पाहायला मिळत आहे. कारण गेल्या काही दिवसांमध्ये त्याने चांगलीच मेहनत घेतली आहे. मला असं वाटतं की, पृथ्वीने आपली बॅटींगची थिअरी बदललेली आहे. मी अशी आशा तरी करू शकतो. कारण सध्याच्या घडीला पृथ्वी हा सर्वोत्तम फॉर्ममध्ये असल्याचे दिसत आहे. त्यामुळे पृथ्वी हा एक सुपरस्टार होऊ शकतो, असे मला वाटत आहे. पण त्यासाठी त्याने काही गोष्टींचा नक्कीच विचार करणं गरजेचं आहे."
from Cricket News in Marathi, क्रिकेट न्यूज़, क्रिकेट ताज्या बातम्या, Marathi Cricket News https://ift.tt/3wt02F7
No comments:
Post a Comment