मुंबई : इंग्लंडचा अष्टपैलू खेळाडू मोइन अलीने आता एक मोठा खुलासा केला आहे. मला लहान असताना जीवे मारण्याचा प्रयत्न केला होता, पण त्यामधून मी बचावलो, असे मोइन अलीने म्हटले आहे. नेमकी ही गोष्ट कधी घडली होती आणि मोइन या सर्व गोष्टींमधून कसा बचावला, हे सर्व त्याने एका खास मुलाखतीमध्ये सांगितले आहे. इंग्लंडच्या गार्डियन या वृत्तपत्राला मोइनने एक खास मुलाखत दिली होती. या मुलाखतीमध्ये मोइनने हा खुलासा केला आहे. शाळेत असताना आपल्याला जीवे मारण्याचा प्रयत्न झाला होता, असे मोइनने यामध्ये सांगितले आहे. मोइनचे वडिल मुनीर यांनीदेखील याबाबतची माहिती आता सर्वांना सांगितली आहे. मोइनने या मुलाखतीमध्ये काय सांगितलं, पाहा... मोइनने या प्रसाबद्दल सांगितले की, " मी १३-१४ वर्षांचा असतानाही ही गोष्ट घडली होती. एका व्यक्तीने गाडीमधून मला मारण्याचा प्रयत्न केला होता. ज्या व्यक्तीने मला मारण्याचा प्रयत्न केला होता, तो एक आशियाई माणूस होता. माझ्या रंगावरुन मी त्याला ब्रिटीश वाटलो आणि त्याने मला मारण्याचा प्रयत्न केला होता. पण या प्रसंगातून मी सुखरुप बचावलो." मोइनच्या वडिलांनी सांगितली संपूर्ण गोष्ट...मोइनचे वडिल मुनीर यांनी क्रिकइन्फो या वृत्तसंस्थेला दिलेल्या मुलाखतीमध्ये या गोष्टीची संपूर्ण माहिती दिली आहे. मुनीर यांनी सांगितले की, " मोइन हा १३ वर्षांचा असताना हा प्रसंग घडला. मोइन त्यावेळी शाळेतून घरी यायला निघाला होता. त्याचवेळी एक भरधाव गाडी मोइनच्या दिशेने आली. पण ती गाडी रस्त्यावर घसरली आणि गाडी पुढे निघून गेली त्यामुळे मोइनला काहीही झाले नाही. पण त्यानंतरही त्या गाडीतली व्यक्ती स्वस्थ बसली नाही. त्या व्यक्तीने गाडी मागे घेतली आणि मोइनला जोरदार धक्का मारला. हा धक्का एवढा जोरदार होता की, गाडी फुटपाथला आदळली आणि ती उलटी झाली. तेथील एका दुकानदाराने हा सर्व प्रकार पाहिला आणि मला लगेच फोन केला. मी धावत त्या ठिकाणी गेलो. त्यावेळी मोइन रडत होता आणि त्याच्या पायामधून भरपूर रक्त वाहत होतं. त्यावेळी मी त्याला तिथून घेऊन गेलो आणि त्याच्यावर उपचार केले. मी याबाबत मोइनला विचारलं, पण त्याने या व्यक्तीला यापूर्वी कधीही पाहिलेलं नव्हतं."
from Cricket News in Marathi, क्रिकेट न्यूज़, क्रिकेट ताज्या बातम्या, Marathi Cricket News https://ift.tt/3wymKeZ
No comments:
Post a Comment