मुंबई : आयपीएलला सुरु होण्यासाठी आता काही तासांचाच अवधी राहीलेला आहे. मुंबई इंडियन्सचा पहिला सामना ९ एप्रिलला आरसीबीबरोबर होणार आहे. या सामन्यापूर्वी रोहित शर्माचा एक व्हिडीओ चांगलाच व्हायरल झाला आहे. कारण या व्हिडीओमध्ये मुंबई इंडियन्सचा कर्णधार रोहित शर्माने फटकेबाजीचा दमदार सराव केला आहे. त्यामुळे आता आयपीएलमध्ये तळपण्यासाठी रोहित शर्मा पुन्हा एकदा सज्ज झाला आहे. रोहितच्या नेतृत्वाखाली मुंबई इंडियन्सच्या संघाने आतापर्यंत विक्रमी पाचवेळा जेतेपद पटकावलेले आहे. त्यामुळे आता यावर्षी मुंबई इंडियन्सचा संघ सहाव्यांदा जेतेपद पटकावणार का, याची उत्सुकता सर्वांनाच लागलेली आहे. मुंबई इंडियन्सचा संघ चेन्नईमध्ये सध्याच्या घडीला सराव करत आहे आणि आयपीएलसाठी सज्ज झाला आहे. मुंबई इंडियन्सचा पहिला सामना विराट कोहलीच्या नेतृत्वाखाली आरसीबीच्या संघाबरोबर ९ एप्रिलला चेन्नईमध्ये होणार आहे. या सामन्यात रोहितकडून धडाकेबाज फटकेबाजीची अपेक्षा चाहत्यांना नक्कीच असेल. पहिल्या सामन्यासाठी कसा असू शकतो मुंबई इंडियन्सचा संघ, पाहा...पहिल्या सामन्यासाठी कर्णधार रोहित शर्माबरोबर यावेळी ख्रिस लीन हा सलामीला येऊ शकतो. त्यानंतर तिसऱ्या स्थानावर सूर्यकुमार यादवची जागा जवळपास निश्चित आहे. त्यानंतर मधल्या फळीत इशान किशन, हार्दिक पंड्या, कायरन पोलार्ड, कृणाल पंड्या यांचा समावेश होऊ शकतो. यावेळी मुंबई इंडियन्सच्या यष्टीरक्षणाची जबाबदारी ही इशान किशनवरच सोपवण्यात येणार आहे. मुंबई इंडियन्सच्या गोलंदाजीमध्ये जास्त बदल होणार नसल्याचेच दिसत आहे. कारण जसप्रीत बुमरा आणि ट्रेंट बोल्ट ही जोडी मुंबई इंडियन्सच्या गोलंदाजीचे सारथ्य करेल. त्याचबरोबर नॅथन कल्टर नाइल हा एक चांगला अष्टपैलू खेळाडूचा पर्याय मुंबई इंडियन्सकडे उपलब्ध आहे आणि त्याला पहिल्या सामन्यात संधी मिळू शकेल. त्याचबरोबर फिरकीपटू म्हणून राहुल चहरचा या संघात समावेश होऊ शकतो. संघ : रोहित शर्मा (कर्णधार), ख्रिस लीन, सूर्यकुमार यादव, इशान किशन, हार्दिक पंड्या, कायरन पोलार्ड, कृणाल पंड्या, राहुल चहर, ट्रेंट बोल्ट, जसप्रीत बुमरा आणि नॅथन कल्टर नाइल.
from Cricket News in Marathi, क्रिकेट न्यूज़, क्रिकेट ताज्या बातम्या, Marathi Cricket News https://ift.tt/3rZiW2M
No comments:
Post a Comment