माजी कसोटीपटू आणि मुंबई क्रिकेट असोसिएशनच्या (एमसीए) क्रिकेट सुधारणा समितीचे माजी अध्यक्ष लालचंद राजपूत यांनी आपल्यावरील अन्यायाला वाचा फोडण्यासाठी एमसीएविरुद्ध आता लढा पुकारला आहे. आपल्या अध्यक्षतेखालील सुधारणा समितीला बरखास्त करण्याचा निर्णय घेण्याचा अधिकार वरिष्ठ समितीला (अपेक्स कौन्सिल) नाही, असे म्हणत त्यांनी एमसीएच्या लोकायुक्त माजी न्यायाधीश विजया तहिलरामाणी यांच्याकडे तक्रार केली आहे. लालचंद राजपूत यांची क्रिकेट सुधारणा समितीचे अध्यक्ष म्हणून नियुक्ती करण्यात आली होती. त्यावेळी समितीत त्यांच्यासह समीर दिघे आणि राजू कुलकर्णी हे दोन सदस्य होते. मात्र या वर्षी १८ फेब्रुवारीला ही समिती बरखास्त करून जतीन परांजपे, विनोद कांबळी आणि नीलेश कुलकर्णी यांच्या त्रिसदस्यीय समितीची स्थापना करण्यात आली. राजपूत यांनी तहिलरामाणी यांना लिहिलेल्या या प्रदीर्घ पत्रात लोढा समितीच्या शिफारशी, अपेक्स कौन्सिलचे अधिकार, एमसीएच्या घटनेतील तरतुदी यांचा सविस्तर परामर्श घेताना आपल्यावर कसा अन्याय झाला आहे, हे स्पष्ट केले आहे. नव्या क्रिकेट सुधारणा समितीची नियुक्ती ही अवैध असल्याचा त्यांचा दावा आहे. उलट माझ्या अध्यक्षतेखालील समितीला तीन वर्षांच्या मुदतीसाठी निवडण्यात आले होते. तसे पत्रच आपल्याला देण्यात आले होते, असेही राजपूत यांनी म्हटल आहे. आपल्या समितीला हितसंबंधांच्या मुद्द्यावरून बरखास्त करण्याचा निर्णयच मुळात चुकीचा होता, असे राजपूत यांचे म्हणणे आहे. आपले कोणतेही हितसंबंध आड येत नाहीत, असे आपण आधीच एमसीएला स्पष्ट केले होते. शिवाय, अपेक्स कौन्सिलला आमच्या हितसंबंधांबाबत निर्णय घेण्याचा अधिकारही नाही. त्यामुळे त्या मुद्द्यावर आपल्या अध्यक्षतेखालील समितीला कसे बरखास्त करता येईल, असे राजपूत यांचे म्हणणे आहे. त्याउपर राजू कुलकर्णी यांनीही स्वतंत्रपणे एमसीएला पत्र लिहिले होते की, आपला तर हितसंबंधांचा कोणताही मुद्दा नव्हता तरी आपल्याला या समितीतून का बाहेर काढण्यात आले? राजपूत यांनी म्हटले आहे की, सुधारणा समितीने वेळोवेळी आपले काम चोख बजावले आहे. याच समितीने निवडलेल्या निवड समितीनेच मुंबईचा संघ निवडला आणि त्यांनी विजय हजारे वनडे स्पर्धा जिंकली. याच सुधारणा समितीने रमेश पोवार यांची प्रशिक्षक म्हणून नियुक्ती केली. त्यांच्या मार्गदर्शनाखाली मुंबईच्या संघाने हजारे स्पर्धा जिंकून वाहवा मिळविली. अशा या सुधारणा समितीला बरखास्त करण्याचा अपेक्स कौन्सिलला अधिकारच नाही, असे राजपूत यांनी या तक्रारीत नमूद केले आहे. लोकायुक्तांकडे दुसरी तक्रारदरम्यान, तहिलरामाणी यांच्याकडे आलेला हा दुसरा अर्ज आहे. याआधी, गौड सारस्वत क्रिकेट क्लबचे रवी मांद्रेकर यांनी ३१ मार्चला अर्ज करून वानखेडे स्टेडियमच्या देखभाल व दुरुस्तीसाठी दिलेल्या कंत्राटात गैरप्रकार झाल्याची तक्रार केली आहे. ७ कोटींचे हे कंत्राट असल्याचे त्यांचे म्हणणे आहे.
from Cricket News in Marathi, क्रिकेट न्यूज़, क्रिकेट ताज्या बातम्या, Marathi Cricket News https://ift.tt/2Py4lOV
No comments:
Post a Comment