मुंबई : दिल्ली कॅपिटल्सचा नवा कर्णधार रिषभ पंत हा महेंद्रसिंग धोनीला टक्कर द्यायला आता सज्ज झाला आहे. कारण चेन्नई सुपर किंग्स आणि दिल्ली कॅपिटल्स यांच्यामधील सामना १० एप्रिलला वानखेडे स्टेडियमवर खेळवण्यात येणार आहे. धोनीचा सामना करताना पंत यावेळी एक खास अस्त्र वापरणार असल्याचेही आता समोर आले आहे. आयपीएलमधील सर्वांत समतोल संघ म्हणून दिल्लीच्या संघाकडे बघितले जाते. शिखर धवन, पृथ्वी साव, अजिंक्य रहाणे, पंत, मार्कस स्टॉइनिस, शिमरॉन हेटमायर, सॅम बिलिंग्ज अशी खोलवर फलंदाजी दिल्लीकडे आहे. स्टीव्ह स्मिथच्या आगमनाने त्यांची मधली फळी मजबूत झाली आहे. गेल्या मोसमात धवनने ६१८ धावा केल्या होत्या. त्याला यंदाही चांगला सूर गवसला आहे. सावने नुकत्याच झालेल्या विजय हजारे करंडक क्रिकेट स्पर्धेत ८२७ धावा केल्या आहेत. पंतकडे कुठल्याही क्षणी सामन्याचे चित्र बदलण्याची क्षमता आहे. रहाणे-स्मिथ जोडीकडे डावाला आकार देण्याची क्षमता आहे. कागिसो रबाडा आणि अॅनरिक नॉर्किया ही जबरदस्त वेगवान जोडी त्यांच्या ताफ्यात आहे. या दोघांनी मिळून गेल्या आयपीएलमध्ये ५२ विकेट घेतल्या होत्या. ख्रिस वोक्स, इशांत शर्मा, उमेश यादव असे अनेक पर्याय दिल्लीकडे आहेत. त्यामुळे आता फलंदाजी आणि गोलंदाजीची ही खास अस्त्र पंत चेन्नईविरुद्धच्या सामन्यात धोनीला टक्कर देताना वापरणार आहे. दिल्लीची कमकुवत बाजू म्हणजे एकाच प्रकारच्या तोडीस तोड खेळाडू त्यांच्याकडे नाहीत. म्हणजे प्रमुख खेळाडूंपैकी एखाद्याला दुखापत झाली, तर त्याची उणीव भरून काढणारा तसाच दुसरा खेळाडू त्यांच्याकडे नाही. त्यामुळे त्यांना रबाडा आणि नॉर्कियाला विश्रांती देता येत नाही. एवढेच कशाला पंतच्या जागीही दुसरा तोडीचा यष्टिरक्षक दिल्ली संघात नाही. इशांत आणि उमेश मागील काही काळापासून मर्यादित षटकांचे सामने फारसे खेळलेले नाहीत. ऋषभ पंत हा भविष्यात भारतीय संघाचा कर्णधार होऊ शकतो, असे भाकीत माजी कर्णधार महंमद अझरुद्दीन यांनी केले आहे. तेव्हा आपल्या नेतृत्वाची चुणूक दाखविण्याची संधी त्याला आहे. दिल्ली संघातील शिखर धवन, पंत, अक्षर पटेल हे आगामी टी-२० वर्ल्ड कपमधील भारताचे शिलेदार आहेत. तेव्हा त्यांच्यासाठीही आयपीएल हे चांगले व्यासपीठ ठरणार आहे. संघ - ऋषभ पंत (कर्णधार), शिखर धवन, पृथ्वी साव, अजिंक्य रहाणे, शिमरन हेटमायर, मार्कस स्टॉइनिस, ख्रिस वोक्स, आर. अश्विन, अक्षर पटेल, अमित मिश्रा, ललित यादव, प्रवीण दुबे, कॅगिरो रबाडा, अॅनरिक नॉर्किया, इशांत शर्मा, आवेश खान, स्टीव्ह स्मिथ, उमेश यादव, रिपल पटेल, विष्णू विनोद, लुकमन मेरिवाला, एम. सिद्धार्थ, टॉम करन, सॅम बिलिंग्ज.
from Cricket News in Marathi, क्रिकेट न्यूज़, क्रिकेट ताज्या बातम्या, Marathi Cricket News https://ift.tt/3usSDDV
No comments:
Post a Comment