चेन्नई : मुंबई इंडियन्सचा पहिलाच सामना येत्या काही तासांमध्येच सुरु होणार आहे. पण या सामन्यापूर्वीच मुंबई इंडियन्स संघाचा कर्णधार रोहित शर्माचा एक व्हिडीओ चांगलाच व्हायरल झाला आहे. कारण या व्हिडीओमध्ये रोहित शर्माने संघाबाबत एक मोठं वक्तव्य केलेलं आहे. पहिल्या सामन्यापूर्वी रोहित म्हणाला की, " मुंबई इंडियन्सच्या संघात काही नवीन चेहरे आपल्याला पाहायला मिळतील. या नवीन खेळाडूंकडे चांगला अनुभव आहे आणि त्याचा फायदा आम्हाला नक्कीच होऊ शकतो. त्याचबरोबर दुबईमध्ये जी आमची कामगिरी झाली होती. त्याच्यामध्ये सातत्य ठेवण्याचा आमचा नक्कीच प्रयत्न असेल. सध्याच्या घडीला संघात उत्साहवर्धक वातावरण आहे आणि याचा फायदा आम्हाला होणार आहे." रोहित पुढे म्हणाला की, " आम्ही सर्वच सात दिवस क्वारंटाइनमध्ये राहिलो होतो. त्यानंतर आम्ही मोकळ्या हवेत श्वास घेतला आहे. हे दिवस कसे होते, याचा अनुभव आम्हा सर्वांना आलेला आहे. आमच्या संघात तीन न्यूझीलंडचे खेळाडू दाखल झाले आहेत. जिमी निशाम हा पहिल्यांदाच मुंबई इंडियन्सच्या संघात दाखल झाला आहे. अॅडम मिल्ने हा यापूर्वीही आमच्या संघात होता. त्याचबरोबर ट्रेंट बोल्टने यापूर्वीही संघासाठी दमदार कामगिरी केली आहे. त्यामुळे या हंगामातही त्यांच्याकडून अपेक्षा उंचावल्या आहेत." मुंबई इंडियन्सच्या संघाला यावर्षी हॅटट्रिकची संधी आहे. त्यांनी २०१९ आणि २०२० मध्ये विजेतेपद मिळवले होते. त्यामुळे जर या वर्षी देखील विजय मिळवल्यास मुंबई हा आयपीएलच्या इतिहासात जेतेपदाची हॅटट्रिक करणारा पहिला संघ ठरेल. अशी संधी याआधी फक्त चेन्नई सुपर किंग्जला मिळाली होती. पण २०१०, २०११ अशी सलग दोन विजेतेपद मिळवल्यानंतर २०१२ साली कोलकाता संघाने अंतिम फेरीत त्यांचा पराभव केला होता. मुंबई इंडियन्सने २०१३, २०१५, २०१७, २०१९ आणि २०२० अशी पाच विजेतेपद मिळवली आहे. या संघाची कामगिरी जबरदस्त अशी आहे. पण आज होणार पहिल्या लढतीत मात्र मुंबई इंडियन्सचा पराभव होण्याची शक्यता आहे. २०११ नंतर मुंबई इंडियन्सने आयपीएलमधील पहिल्या सामन्यात विजय मिळवलेला नाही. ज्या वर्षी मुंबईने पहिल्यांदा आयपीएलचे विजेतेपद मिळवले होते त्यावर्षी त्यांनी पहिल्याच सामन्यात पराभव स्विकारला होता. त्यानंतर गेल्या वर्षापर्यंत म्हणजे २०२० पर्यंत त्यांना पहिल्या सामन्यात पराभव झाला.
from Cricket News in Marathi, क्रिकेट न्यूज़, क्रिकेट ताज्या बातम्या, Marathi Cricket News https://ift.tt/3rY5hZW
No comments:
Post a Comment