चेन्नई : मुंबई इंडियन्सच्या चिंतेत आता चांगलीच भर पडली असेल. कारण मुंबई इंडियन्सच्या संघाकडून सातत्याने मोठ्या चुका होत आहेत आणि त्यामुळेच त्यांना आजच्या सामन्यात दिल्ली कॅपिटल्सकडून पराभव पत्करावा लागला. मुंबई इंडियन्सला आतापर्यंत चांगली सुरुवात मिळालेली नाही. त्याचबरोबर क्विंटन डीकॉक आणि रोहित शर्मा यांना आतापर्यंत चांगली सलामी देता आलेली नाही. हीच मुंबईसाठी मोठी चिंतेची बाब आहे. मुंबईच्या डावाच्या सुरुवातीलाच त्यांना आतापर्यंत धक्का बसत आला आहे. त्यामुळेच त्यांना मोठी धावसंख्या उभारता आलेली नाही. रोहित शर्माला आतापर्यंत मोठी खेळी साकारता आलेली नाही. त्याचबरोबर स्थिरस्थावर झाल्यावर रोहित बाद होत असल्याचे पाहायला मिळाले आहे. रोहितने आजच्या सामन्यात या हंगामातील सर्वाधिक ४४ धावा केल्या खऱ्या, पण रोहितला अजूनही अर्धशतकी खेळी साकारता आलेली नाही. त्यामुळे मुंबईसाठी ही चिंतेची बाब आहे. जर मुंबई इंडियन्सला मोठी धावसंख्या उभारायची असेल तर रोहितने चुक सुधारून मोठी खेळी साकारणे गरजेचे आहे. मधल्या फळीतील फलंदाजी ही मुंबईसाठी फार मोठी डोकेदुखी ठरली आहे. खासकरून हार्दिक आणि कृणाल या पंड्या बंधूंना आतापर्यंत एकाही सामन्यात चांगली फलंदाजी करता आलेली नाही. त्यामुळेच मुंबई इंडियन्स आतापर्यंत मोठी धावसंख्या गाठू शकलेला नाही. कायरन पोलार्डने गेल्या सामन्यात चांगली फलंदाजी केली होती खरी, पण त्याला आजच्या सामन्यात मोठी खेळी साकारण्यात अपयश आहे. इशान किशनही आतापर्यंत अपयशी ठरत आलेला आहे. आजच्या सामन्यात इशान जास्त काळ खेळपट्टीवर थांबला खरा, पण त्याला ट्वेन्टी-२० क्रिकेटला साजेशी फलंदाजी करता आली नाही. आजच्या सामन्यात इशान किशनने २८ चेंडूंत २६ धावा केल्या. ट्वेन्टी-२० क्रिकेटमध्ये एवढी संयमी फलंदाजी करुन चालत नाही. मुंबई इंडियन्सची गोलंदाजी चांगली होत आहे. पण त्यांची फलंदाजी हा चिंतेचा विषय आहे. यामध्ये सुधारणा झाली तरच मुंबई इंडियन्स विजय मिळवू शकते. पण या चुका सुधारल्या गेल्या नाहीत तर मुंबई इंडियन्सचा संघाला प्ले-ऑफमध्ये पोहोचणे कठीण होऊन बसू शकते.
from Cricket News in Marathi, क्रिकेट न्यूज़, क्रिकेट ताज्या बातम्या, Marathi Cricket News https://ift.tt/3em0s7Q
No comments:
Post a Comment