सिडनी, : ऑस्ट्रेलियाच्या संघाला दुखापतींचे ग्रहण लागल्याचे पाहायला मिळत आहे. कारण गेल्या आठवड्याभरात ऑस्ट्रेलियाचे बरेच खेळाडू जखमी झाले आहेत. त्यामुळे भारताविरुद्धच्या पहिल्या कसोटी सामन्यासाठी ऑस्ट्रेलियाच्या संघात मोठा बदल झाल्याचे पाहायला मिळत आहे. या बदलामुळे भारतीय संघाची चिंता वाढणार, असे म्हटले जात आहे. रविवारी ऑस्ट्रेलियाच्या संघात वेगवान गोलंदाज मिचेल स्टार्कला संधी देण्यात आली होती. आज ऑस्ट्रेलियाने आपल्या संघात अष्टपैलू खेळाडू मोइसेस हेनरिक्सचा समावेश केला आहे. हेनरिक्सच्या समावेशाने ऑस्ट्रेलियाचा संघ अधिक बळकट झाल्याचे चाहत्यांचे म्हणणे आहे. कारण हेनरिक्स हा चांगली फलंदाजी आणि उपयुक्त गोलंदाजीही करतो. त्याचबरोबर २०१६ नंतर हेनरिक्सला चार वर्षांनी ऑस्ट्रेलियाच्या कसोटी संघात स्थान मिळाले आहे. त्यामुळे त्याच्यासाठी ही संधी महत्वाची असेल. सिडनी येथे झालेल्या सराव सामन्यात ऑस्ट्रेलियाच वेगवान गोलंदाज सीन अॅबॉटला दुखापत झाली होती. त्यामुळे तो भारताविरुद्धच्या पहिल्या सामन्यात खेळू शकणार नाही. त्यामुळे सीनच्या जागी ऑस्ट्रेलियाच्या संघात हेनरिक्सचा समावेश करण्यात आला आहे. सोमवारी हेनरिक्सने फिटनेस टेस्ट पास केली असून तो पहिल्या कसोटी सामन्यासाठी ऑस्ट्रेलियाच्या संघात असेल. दोन वर्षापूर्वी भारतीय संघाने विराट कोहलीच्या नेतृत्वाखाली इतिहास घडवला होता. टीम इंडियाने ऑस्ट्रेलियात प्रथमच कसोटी मालिका जिंकली होती. भारताच्या दिग्गज कर्णधारांना ७१ वर्षात जे जमले नव्हते ते विराट कोहलीने करून दाखवले होते. आता भारतीय संघ पुन्हा एकदा ऑस्ट्रेलियात त्यांच्याविरुद्ध कसोटी मालिकेत लढत आहे. कसोटी मालिका १) पहिली कसोटी- १७ ते २१ डिसेंबर, एडिलेड ओव्हल- डे/नाईट (सकाळी ९ वाजता) २) दुसरी कसोटी- २६ ते ३० डिसेंबर, मेलबर्न (पहाटे ५ वाजता) ३) तिसरी कसोटी- ७ ते ११ जानेवारी २०२१, सिडनी (पहाटे ५ वाजता) ४) चौथी कसोटी- १५ ते १९ जानेवारी, २०२१, गाबा (पहाटे साडे पाच वाजता) भारताच्या या दौऱ्यातील सर्व सामन्याचे लाइव्ह प्रक्षेपण सोनी सिक्स आणि डीडी स्पोट्स वर होणार आहे. या शिवाय Sony LIVवर लाइव्ह स्ट्रीमिंग होईल. कसोटी मालिका फक्त सोनी सिक्स आणि Sony LIV वर दिसेल. या शिवाय भारतीय संघ दोन सराव सामने खेळणार आहे. या सामन्याचे लाइव्ह प्रक्षेपण क्रिकेट ऑस्ट्रेलियाच्या अॅपवर केले जाणार आहे. भारत आणि ऑस्ट्रेलिया यांच्या लढतीचे LIVE UPDATE आणि स्कोअरकार्ड महाराष्ट्र टाइम्सच्या वेबसाइटवर तुम्ही पाहू शकता.
from Cricket News in Marathi, क्रिकेट न्यूज़, क्रिकेट ताज्या बातम्या, Marathi Cricket News https://ift.tt/3qRVvsV
No comments:
Post a Comment