IND vs AUS : विराट कोहलीला नेतृत्वामध्ये 'हे' बदल करायला हवेत, सांगतोय हा दिग्गज भारतीय खेळाडू

सिडनी, : भारताचा कर्णधार विराट कोहली हा आता ऑस्ट्रेलियाविरुद्धच्या पहिल्या कसोटी सामन्यासाठी सज्ज झाला आहे. पण भारताचे नेतृत्व करत असताना विराटने कोणते बदल नेमके करायला हवेत, याबाबत भारताचे माजी महान क्रिकेटपटू आणि समालोचक व्हीव्हीएस लक्ष्णने आपले मत व्यक्त केले आहे. लक्ष्मण म्हणाला की, " कोहली हा बऱ्याच खेळाडूंसाठी आदर्शवत असा आहे. पण मला वाटते की, कोहलीने अजूनही आपल्या नेतृत्वामध्ये काही बदल करणे गरजेचे आहे. कारण हे बदल झाले तर ते संघासाठी आणि खेळाडूंसाठी हिताचे ठरणार आहे. माझ्यामते कोहली हा सातत्याने प्रयोग करत असतो. त्यामुळे कदाचित खेळाडूंना असुरक्षित वाटू शकते आणि त्यांच्या कामगिरीवर या गोष्टीचा परीणाम होऊ शकतो. त्यामुळे कोहलीने सातत्याने प्रयोग करू नयेत. त्याचबरोबर खेळाडूंमध्ये विश्वास निर्माण करायला हवा." लक्ष्मण पुढे म्हणाला की, " माझ्यामते कोहली हा मैदानात पूर्णपणे व्यस्त असतो. तो एवढा व्यस्त असतो की त्याच्या चेहऱ्यावर लगेच भाव दिसून येतात. विराट ज्यापद्धतीने मैदानात समर्पण करतो, ते मला सर्वात जास्त आवडते. कारण कायम मैदानात सजग असतो. फलंदाजी असो किंवा क्षेत्ररक्षण त्याचे लक्ष मैदानात सर्व ठिकाणी असते. माझ्यामते ही गोष्ट कोहलीकडून शिकायला हवी. कोहली मैदानात एक सकारात्मक वातावरण निर्माण करतो आणि त्याचा फायदा संघातील खेळाडूना होत असल्याचे पाहायला मिळते." भारत आणि ऑस्ट्रेलिया यांच्यातील कसोटी मालिकेला उद्यापासून सुरुवात होणार आहे. पण कसोटी मालिकेपेक्षा सध्याच्या घडीला जास्त चर्चा सुरु आहे ती विराट कोहलीची. कारण कोहली मालिकेतील फक्त एक कसोटी सामना खेळणार आहे. त्यानंतर कोहली मायदेशी रवाना होणार आहे. कोहली गेल्यावर नेमका काय प्लॅन असेल, याबाबत उपकर्णधार अजिंक्य रहाणेला एक प्रश्न विचारला गेला. या प्रश्नानंतर रहाणेने असे काही उत्तर दिले की, सर्वांची बोलतीच बंद करून टाकली. अजिंक्य म्हणाला की, " मी वर्तमानात जगतो. त्यामुळे सध्याचा क्षण माझ्यासाठी फार महत्वाचा आहे. सध्याच्या घडीला विराट हा भारतीय संघाचा कर्णधार आहे आणि तो पहिला सामना खेळणार आहे. त्यामुळे मी फक्त या सामन्याबाबत विचार करत आहे आणि कोहलीला कशी मदत करता येईल, यासाठी प्रयत्नशील आहे. विराट मायदेशी परतला की त्यानंतर आम्ही चर्चा करणार आहोत."

from Cricket News in Marathi, क्रिकेट न्यूज़, क्रिकेट ताज्या बातम्या, Marathi Cricket News https://ift.tt/3mq3bPR