'त्या'वेळी मी स्वतः विराटला मेसेज केला होता, स्टीव्हन स्मिथने केला मोठा खुलासा

सिडनी, : विराट कोहली आणि स्टीव्हन स्मिथ हे दोघेही आक्रमक फलंदाज म्हणून सर्वांना परिचीत आहेत. या दोघांमध्ये बऱ्याचदा कोण जास्त धावा करतो, ही स्पर्धा पाहायला मिळते. त्यामुळे मैदानात हे दोघेही पक्के वैरी असतात. पण आता स्मिथनेच एक मोठा खुलासा केला आहे. यावेळी स्मिथने एका घटनेनंतर मी स्वतः विराटला मेसेज केला होता, असे वक्तव्य केले आहे. भारत आणि ऑस्ट्रेलिया यांच्यातील पहिल्या कसोटी सामन्याला काही तासांमध्येच सुरुवात होणार आहे. पण त्यापूर्वीच विराट आणि स्मिथ यांचा एक व्हिडीओ चांगलाच व्हायरल झालेला पाहायला मिळत आहे. भारतीय क्रिकेट संघाने पहिल्या कसोटी सामन्याच्या पूर्वसंध्येला हा व्हिडीओ सोशल मीडियावर शेअर केला असून तो चांगलाच व्हायरल झालेला पाहायला मिळत आहे. ही गोष्ट नेमकी घडली तरी कधी...ही गोष्ट २०१९ साली झालेल्या विश्वचषकात घडलेली पाहायला मिळाली. त्यावेळी भारत आणि ऑस्ट्रेलिया हे दोन्ही संघ एकमेकांसमोर उभे ठाकले होते. त्यावेळी स्मिथ हा बंदीचा कालावधी संपवून क्रिकेट खेळायला लागला होता. हा सामना सुरु असताना प्रेक्षकांनी स्मिथची हुर्यो उडवायला सुरुवात केली. त्याचबरोबर स्मिथबाबत चाहते काही घोषणाही देत होते. त्यावेळी मैदानात असलेला विराट कोहली हा पुढे सरसावला आणि त्याने स्मिथला डिवचू नका तर त्याला पाठिंबा. तुमच्या पाठिंब्याची त्याला गरज आहे, असे कोहलीने म्हटले होते. त्यानंतर स्मिथने मैदानात कोहलीचे आभारही मानले होते. या मुलाखतीमध्ये स्मिथने कोहलीला या घटनेची आठवण करून दिली. त्याचबरोबर मी तुला या घटनेनंतर मेसेजही केला होता, असे म्हटले आहे. त्याचबरोबर कोहलीने यावेळी सांगितले की, " जी काही गोष्ट घडली होती, ती जुनी झाली होती. त्यानंतर बराच काळ तुम्ही क्रिकेटपासून दूर होतात. त्यानंतर तुम्ही आंतरराष्ट्रीय क्रिकेटमध्ये पाय रोवण्याचा प्रयत्न करत होतात. त्यावेळी तुम्हाला चाहते टार्गेट करत होते आणि ते मला आवडले नाही. त्यामुळेच मी त्यांना थांबवण्याचा निर्णय घेतला होता."

from Cricket News in Marathi, क्रिकेट न्यूज़, क्रिकेट ताज्या बातम्या, Marathi Cricket News https://ift.tt/3mqDPBo