अॅडलेड, : ऑस्ट्रेलियाविरुद्धच्या पहिल्या सामन्यात भारताने ज काही कमावले होते ते गमावण्याची पाळी त्यांच्यावर आली. पहिल्या दिवसाच्या दुसऱ्या सत्रात भारतीय संघाने दमदार फलंदाजी केली होती. पण तिसऱ्या सत्रात भारताने कर्णधार विराट कोहलीची महत्वाची विकेट गमावली. त्याचबरोबर भारतीय संघ अपेक्षित धावसंख्या उभारू शकला नसल्याचे पाहायला मिळाले. त्यामुळे दिवसाअखेर ऑस्ट्रेलियाचे पारडे भारतापेक्षा वरचढ असल्याचे पाहायला मिळाले. भारतीय संघाची पहिल्या दिवसअखेर ६ बाद २३३ अशी स्थिती आहे. भारताने या सामन्यात नाणेफेक जिंकली आणि प्रथम फलंदाजी करण्याचा निर्णय घेतला. पण भारताची सुरुवात यावेळी चांगली झाली नाही. कारण भारताचा सलामीवीर पृथ्वी शॉ हा दुसऱ्याच चेंडूवर बाद झाला आणि त्याला भोपळाही फोडता आला नाही. त्यानंतर दुसरा सलामीवीर मयांक अगरवालला यावेळी मोठी खेळी साकारण्यात अपयश आले, त्याला १७ धावा करता आल्या. पण त्यानंतर कर्णधार विराट कोहली आणि चेतेश्वर पुजारा यांनी भारताचा डाव सावरला. आजच्या सामन्यात कोहली आणि चेतेश्वर पुजारा यांनी तिसऱ्या विकेटसाठी ६८ धावांची भागीदारी रचली. ही जोडी आता मोठी धावसंख्या उभारणार, असे वाटत होते. पण यावेळी पुजारा ४३ धावांवर असताना बाद झाला. पुजाराला ऑस्ट्रेलियाचा फिरकीपटू नॅथन लायनने बाद केले. कोहली आणि पुजारा यांनी आतापर्यंत सहावेळा ऑस्ट्रेलियाविरुद्ध अर्धशतकी भागीदारी रचली आहे. पुजारा बाद झाल्यावर कोहली आणि अजिंक्य रहाणे यांच्यामध्येही चांगली भागीदारी झाली. या दोघांनी चौथ्या विकेटसाठी ८८ धावा जमवल्या. पण यावेळी एक चुक भारतीय संघाला चांगलीच महागात पडली. एक चोरटी धाव घेण्याच्या प्रयत्नामध्ये कोहली धावचीत झाला. कोहलीने यावेळी आठ चौकारांच्या जोरावर ७४ धावा केल्या. कोहली बाद झाल्यावर काही वेळातच अजिंक्य रहाणेही बाद झाला आणि भारतीय संघ पिछाडीवर आला. अजिंक्यने यावेळी तीन चौका आणि एका षटकाराच्या जोरावर ४२ धावा केल्या. अजिंक्य बाद झाल्यावर भारताला हुमान विहारीच्या रुपात अजून एक धक्का बसला. भारतीय संघाची एकेकाळी ३ बाद १८८ अशी स्थिती होती. पण कोहली बाद झाल्यावर भारताने अजून दोन फलंदाज गमावले आणि त्यांची ६ बाद २०६ अशी अवस्था झाली.
from Cricket News in Marathi, क्रिकेट न्यूज़, क्रिकेट ताज्या बातम्या, Marathi Cricket News https://ift.tt/3nrSYnm
No comments:
Post a Comment