नवी दिल्ली : न्यूझीलंडविरुद्धच्या फायनलसाठी भारताचा ११ जणांचा संघ आज जाहीर करण्यात आला आहे. या संघात भारतीय संघाने तीन वेगवान गोलंदाजांना संधी दिली आहे. या संघात रोहित शर्मा आणि शुभमन गिल यांच्याकडे सलामीची जबाबदारी असेल. त्यानंतर चेतेश्वर पुजारा, कर्णधार विराट कोहली, अजिंक्य रहाणे आणि यष्टीरक्षक रिषभ पंत यांना संधी देण्यात आली आहे. त्याचबरोबर रवींद्र जडेजा आणि आर. अश्विनसारखे अनुभवी फिरकी गोलंदाज या संघात असतील. या संघात मोहम्मद शमी, जसप्रीत बुमरा आणि इशांत शर्मा यांना अंतिम ११ खेळाडूंमध्ये स्थान देण्यात आले आहे. भारत आणि न्यूझीलंड या दोन्ही देशांमध्ये आतापर्यंत ५९ कसोटी सामने खेळवण्यात आले आहेत. या ५९ कसोटी सामन्यांमध्ये भारताने २१ सामन्यांमध्ये विजय मिळवला आहे, तर न्यूझीलंडला १२ सामन्यांमध्ये विजय मिळवता आला आहे. या ५९ सामन्यांपैकी २६ सामने हे अनिर्णीत राहीलेले आहेत. त्यामुळे कसोटीतील आकडेवारीचा विचार करता भारताचे पारडे हे न्यूझीलंडपेक्षा जड आहे. भारत आणि न्यूझीलंड यांच्यातील आयसीसीच्या स्पर्धेतील आकडेवारीही आता समोर आली आहे. आयसीसीच्या स्पर्धेत भारत आणि न्यूझीलंड हे दोन्ही देश ११ वेळा आमने-सामने आले आहेत. पण यामध्ये भारताला आतापर्यंत फक्त तीनच सामने जिंकता आले आहेत, तर न्यूझीलंडने तब्बल आठ सामन्यांमध्ये विजय मिळवला आहे. आतापर्यंत दोन्ही संघांमध्ये वनडे विश्वचषकात आठ सामने झाले आहेत, यामध्ये न्यूझीलंडने पाच सामने जिंकले आहेत, तर भारतीय संघाला तीन सामन्यांमध्ये विजय मिळवता आला आहे. त्याचबरोबर चॅम्पियन्स ट्रॉफी स्पर्धेत दोन्ही संघांनी प्रत्येकी एक विजय मिळवला आहे. त्याचबरोबर ट्वेन्टी-२० सामन्यांमध्ये दोन्ही संघांनी प्रत्येकी दोन विजय मिळवले आहेत. त्यामुळे आयसीसीच्या स्पर्धेत भारतापुढे न्यूझीलंडचेच पारडे जड असल्याचे पाहायला मिळत आहे. त्यामुळे सध्याच्या घडीला तरी दोन्ही संघाचे पारडे हे समान असल्याचे पाहायला मिळत आहे. त्यामुळे आता फायनलमध्ये नेमकं काय होणार, याची उत्सुकता चाहत्यांना नक्कीच असेल. जडेजासाठी असेल सुवर्णसंधी...जडेजासाठी एक सुवर्णसंधी चालून आली आहे. कारण फायनलच्या सामन्यात फक्त काही धावा केल्यावर तो दिग्गज कपिल देव यांच्या यादीत स्थान पटकावणार आहे. सध्याच्या घडीला जडेजाच्या खात्यात १९५४ धावा आहेत आणि २२० विकेट्स आहेत. आता फक्त ४४ धावा केल्यावर जडेजाला एक बहुमान मिळणार आहे. फायनलमध्ये ४४ धावा केल्यावर जडेजाच्या २ हजार धावा पूर्ण होतील. त्यामुळे क्रिकेट विश्वात दोन हजार धावा आणि दोनशेपेक्षा जास्त विकेट्स मिळवणाऱ्या यादीत त्याचा समावेश होणार आहे. या यादीमध्ये आतापर्यंत दिग्गज अष्टपैलू खेळाडूंचा समावेश आहे. त्यामुळे आता जडेजा ४४ धावा करून हा विक्रम आपल्या नावावर करतो का, याची उत्सुकता सर्वांना असेल.
from Cricket News in Marathi, क्रिकेट न्यूज़, क्रिकेट ताज्या बातम्या, Marathi Cricket News https://ift.tt/3cOxltQ
No comments:
Post a Comment