नवी दिल्ली : भारताच्या दोन्ही विश्वविजयांमध्ये सिंहाची भूमिका बजावणाऱ्या युवराज सिंगने आज आपल्या चाहत्यांना एक आनंदाची बातमी दिली आहे. युवराज आणि त्याची पत्नी हेझल कीच यांना पूत्ररत्न झालं आहे. त्यामुळे भारताच्या सिक्सर किंगच्या घरी नव्या युवराजचं आगमन झालं आहे, अशी प्रतिक्रीया बऱ्याच चाहत्यांनी व्यक्त केली आहे. युवराजने याबाबतचे ट्विट करत आपल्या घरी आनंदाची बातमी आल्याचे सर्वांना सांगितले आहे. पण हे सांगत असतानाच त्याने चाहत्यांना प्रायव्हसी जपण्याचे आव्हान केले आहे, त्याचबरोबर त्याने देवाचेही यावेळी आभार मानले आहे. युवराज सिंग आणि अभिनेत्री हेझल कीच यांचे २०१६ साली लग्न झाले होते. त्यानंतर काहीवेळा युवराजच्या घरी पाळणार हलला, अशा अफवा पसरल्या होत्या. पण या अफवांना युवराज आणि हेझल यांनी महत्व दिले नव्हते. पण मुलगा झाल्यावर मात्र युवराजने ही माहिती स्वत:हून सोशल मीडियावर दिली आहे. युवराजच्या ट्विटला यावेळी बॉलीवूडमधील अभिनेत्री नेहा धुपिया आणि बिपाशा बासू यांनी लाइक करत या दोघांचेही अभिनंदन केले आहे. नोव्हेंबर २०२१मध्ये युवराज आणि हेझल यांच्या लग्नाचा पाचवा वाढदिवस होता. त्यावेळी युवराजने केलेले वक्तव्य बऱ्याच जणांच्या अजूनही लक्षात असेल. युवराजने त्यावेळी म्हटले होते की, " लग्नानंतर माझ्यामध्ये एवढा मोठा बदल होईल याचा मी कधीही विचार केला नव्हता. पण गेल्या पाच वर्षांमध्ये माझ्यामध्ये भरपूर बदल झाला आहे. गेली पाच वर्षे माझ्यासाठी सुखावणाही होती आणि यापुढेही असेच सुख मला मिळेल,अशी आशा आहे. जेव्हा मी आणि हेझल पहिल्यांदा भेटलो होतो तेव्हा काही तरी मोठं घडतंय, असं वाटतं होतं. पण नेमकं काय घडतंय, हे समजत नव्हतं. पण त्यानंतर आतापर्यंत बऱ्याच चांगल्या गोष्टी घडल्या आहेत." युवराजचा २००७ आणि २०११ या विश्वचविजयात मोलाचा वाटा होता. युवराजने २००७ साली झालेल्या विश्वचषकात एका षटकात सहा षटकार फटकावत विश्वविक्रम रचला होता. त्याचबरोबर भारताने जेव्हा २०११ साली विश्वचषक जिंकला तेव्हा युवराज हा त्या स्पर्धेतील सर्वोत्तम खेळाडू ठरला होता. या विश्वचषकानंतर युववराजला कर्करोगाने गाठले होते. पण युवराजने कर्करोगावर मात करून तो पुन्हा एकदा मैदानात परतला होता. पण त्यानंतर युवराज जास्त काळ आंतरराष्ट्रीय क्रिकेटमध्ये रमला नाही. त्यानंतर भारतीय संघातून युवराजने निवृत्ती घेतली असली तरी युवराज जगभरतील क्रिकेट लीगमध्ये अजूनही खेळत आहे.
from Cricket News in Marathi, क्रिकेट न्यूज़, क्रिकेट ताज्या बातम्या, Marathi Cricket News https://ift.tt/33QOAJY
No comments:
Post a Comment