नवी दिल्ली: विश्वचषकानंतर क्रिकेटच्या मैदानापासून दूर असलेला भारताचा दिग्गज क्रिकेटपटू व माजी कर्णधार महेंद्रसिंग धोनीचं भारतीय संघात कधी पुनगरागमन होणार, हा प्रश्न अनुत्तरीत असतानाच भारत विरुद्ध बांगलादेश या संघांत होणाऱ्या पहिल्या दिवसरात्र कसोटीत धोनीचं दर्शन होणार आहे. या सामन्यात समालोचकाच्या भूमिकेत धोनी दिसेल, हे जवळपास निश्चित झाले आहे. भारत आणि बांगलादेश यांच्यात २२ नोव्हेंबरपासून पहिला दिवसरात्र कसोटी सामना कोलकाता येथील ईडन गार्डन स्टेडियमवर रंगणार आहे. या सामन्यात धोनीला गेस्ट कमेंटेटर म्हणून पाचारण करण्यात येणार आहे. या सामन्याच्या प्रसारणाचे हक्क असलेल्या स्टार स्पोर्ट्सने एक प्रस्ताव बीसीसीआयचे अध्यक्ष सौरव गांगुली यांना पाठवला आहे. गांगुली यांच्याकडून या प्रस्तावाला ग्रीन सिग्नल मिळाल्यास धोनी ईडन गार्डन स्टेडियमवर कमेंट्री बॉक्समध्ये बसून समालोचन करताना दिसणार आहे. भारतासाठी ईडन गार्डनवर होणारा कसोटी सामना ऐतिहासिक आहे. भारताचा हा पहिलाच दिवसरात्र कसोटी सामना असेल. त्यामुळे या सामन्यात माजी कसोटी कर्णधारांना विशेष अतिथी म्हणून निमंत्रित करण्याची योजना आहे. सामन्याच्या पहिल्या आणि दुसऱ्या दिवशी भारताचे सर्व माजी कर्णधार उपस्थित राहणार आहेत. सामना सुरू होण्याआधी राष्ट्रगीतावेळी भारतीय संघाचा कर्णधार विराट कोहली व टीमसह सर्व माजी कर्णधार मैदानात अवतरणार आहेत. त्यानंतर सामन्याचं समालोचन करताना हे सर्व दिग्गज भारतीय कसोटी क्रिकेटच्या इतिहासाला उजाळा देणार आहेत. कसोटी इतिहासातील ठळक आठवणी मैदानावरील मोठ्या स्क्रीनवर दाखवण्यात येणार आहेत. दरम्यान, विश्वचषकात उपांत्यफेरीच्या सामन्यात खेळला होता. त्या सामन्यानंतर धोनी क्रिकेटच्या मैदानापासून दूर आहे. वेस्ट इंडिज, दक्षिण आफ्रिका आणि बांगलादेश या तिन्ही संघांविरुद्ध झालेल्या मालिकांत धोनी भारतीय संघात नव्हता. सरावाचेही थेट प्रक्षेपण दिवसरात्र कसोटी सामन्याआधी पिंक बॉलने दोन्ही संघ सराव करणार असून या सराव सत्राचेही थेट प्रक्षेपण करण्याची योजना आहे. या सराव सत्राला प्रेक्षकांना स्टेडियममध्ये मोफत प्रवेश दिला जाणार आहे.
from Cricket News in Marathi, क्रिकेट न्यूज़, क्रिकेट ताज्या बातम्या, Marathi Cricket News https://ift.tt/2NkIXbT
No comments:
Post a Comment