एडिलेड : ऑस्ट्रेलियाचा फिरकीपटू एश्टन एगरला रविवारी एका सामन्यादरम्यान नाकावर गंभीर दुखापत झाली. विशेष म्हणजे एश्टन एगरच्या भावाने लगावलेल्या फटकारावरच तो रक्तबंबाळ झाला. नाकातून रक्त आल्यानंतर एश्टनला मैदानाच्या बाहेर नेण्यात आलं. पश्चिम ऑस्ट्रेलियातील मार्श वन डे चषकातील दक्षिण ऑस्ट्रेलियाविरुद्धच्या सामन्यातील हा प्रकार आहे. पश्चिम ऑस्ट्रेलियाने या सामन्यात ६ धावांनी विजय मिळवला. एश्टन एगर केरन रोल्टन ओव्हल मैदानात सुरु असलेल्या सामन्यात मिड ऑनवर क्षेत्ररक्षणासाठी उभा होता. त्याचा भाऊ वेसने मारलेला चेंडू तो पकडण्याच्या बेतात होता, मात्र चेंडू पकडता आला नाही आणि हाच चेंडू थेट नाकावर आदळला. दोन्ही डोळ्यांच्या मध्ये चेंडू लागल्यामुळे एश्टन एगर रक्तबंबाळ झाला होता. ऑस्ट्रेलिया डॉट कॉम डॉट एयूने ट्विटरवर एक व्हिडीओही शेअर केला आहे, ज्यात एश्टनच्या चेहऱ्यावर रक्त दिसत आहे. एश्टनचा सहकारी रिचर्ड्सनने जवळ जाऊन पाहताच तातडीने वैद्यकीय टीमला मैदानात पाचारण केलं. फलंदाज वेसही भावाला पाहण्यासाठी खेळपट्टी सोडून धावत आला. या घटनेमुळे मला मोठा धक्का बसला असल्याचं वेस एगर म्हणाला. पण भावासोबत बोलल्यानंतर बरं वाटलं असंही त्याने सांगितलं. या घटनेवर एश्टन एगरनेही प्रतिक्रिया दिली. तो म्हणाला, ‘झेल घेताना चेंडू हातातून निसटला आणि थेट चष्म्यावर लागला. चेंडू लागल्यामुळे चष्म्याचे दोन भाग झाले.’ डॉक्टरांनी या जखमेवर टाके घ्यायला सांगितले होते, पण ही जखम प्लास्टिक सर्जनला दाखवणार असल्याचं एश्टनने सांगितलं. ‘चेंडू लागल्यामुळे मोठा त्रास झाला आणि वाईटही वाटलं. मी इतर कोणत्याही गोष्टीबाबत विचार केला नाही, फक्त भावाला पाहण्यासाठी खेळपट्टी सोडून धावलो. मला वाईट वाटलं, पण सुदैवाने तो आता बरा आहे’, अशी प्रतिक्रिया वेसने दिली.
from Cricket News in Marathi, क्रिकेट न्यूज़, क्रिकेट ताज्या बातम्या, Marathi Cricket News https://ift.tt/2COo6Yo
No comments:
Post a Comment