नवी दिल्ली: बांगलादेशविरुद्धच्या अखेरच्या टी-२० सामन्यात हॅट्ट्रिक घेऊन क्रिकेट जगताचं लक्ष वेधून घेणारा भारताचा मध्यमगती गोलंदाज दीपक चहरनं माजी कर्णधार महेंद्रसिंग धोनीचं कौतुक केलं आहे. जेव्हा-जेव्हा मी अडचणीत सापडतो, त्यावेळी माहीनं दिलेल्या टिप्स आठवतात, असं चहर म्हणाला. 'टाइम्स ऑफ इंडिया. कॉम'ला दिलेल्या विशेष मुलाखतीत तो बोलत होता. महेंद्रसिंग धोनीनं दिलेल्या टिप्स या अनेक युवा क्रिकेटपटूंसाठी यशाचा मंत्र ठरल्या आहेत असं बोललं तर ते वावगं ठरणार नाही, धोनीनं अनेक तरूण क्रिकेटपटूंना घडवलं आहे, असंही चहर म्हणाला. जेव्हा-जेव्हा मी अडचणीत असतो त्यावेळी मला धोनी भाईनं दिलेल्या टिप्स आठवतात, असंही तो म्हणाला. नागपूरमध्ये बांगलादेशविरुद्धच्या तिसऱ्या आणि अखेरच्या टी-२० सामन्यात दीपक चहरनं हॅट्ट्रिक घेतली होती. सय्यद मुश्ताक अली करंडकात विदर्भविरुद्ध राजस्थानकडून खेळताना त्यानं हॅट्ट्रिक घेतली होती. मात्र, त्यानंतर त्याच्याकडून अशी कामगिरी झाली नव्हती. दीपक आतापर्यंत आठ आंतरराष्ट्रीय सामने खेळला आहे. एक एकदिवसीय आणि सात टी-२० सामन्यांमध्ये त्यानं भारतीय संघाचं प्रतिनिधित्व केलं आहे. त्यानं आपल्या यशामागील श्रेय महेंद्रसिंग धोनीला दिलं आहे. 'मी आयपीएल स्पर्धेला श्रेय देऊ इच्छितो. चेन्नई संघाकडून खेळताना मला कर्णधार माही भाईकडून खूप काही शिकायला मिळालं. फलंदाजाची मानसिकता आणि अशा परिस्थितीत गोलंदाजी कशी करायची हे मी शिकलो. आंतरराष्ट्रीय क्रिकेटमध्ये खेळताना या गोष्टींची मला खूप मदत झाली. मला ज्या फलंदाजांना गोलंदाजी करायची आहे, त्यांचे फलंदाजी करतानाचे व्हिडिओ पाहण्याची मला सवय आहे. माझ्या खेळात जे काही चांगले बदल घडून आले त्याला या गोष्टी कारणीभूत आहेत. तुमच्या कष्टाचे फळ मिळाले की छान वाटते,' असंही तो म्हणाला. दरम्यान, दीपक चहरच्या कामगिरीवर त्याचे वडील लोकेंद्रसिंग यांनी प्रतिक्रिया दिली होती. ‘गेल्या रविवारी पार पडलेल्या बांगलादेशविरुद्धच्या लढतीत यशस्वी कामगिरी होण्यासाठी माझ्या मुलाने नेटसरावात किमान एक लाख चेंडू टाकले असतील. त्या मेहनतीचेच फळ आता मिळते आहे,’ असं ते म्हणाले होते. चहर याने बांगलादेशविरुद्धच्या तिसऱ्या टी-२० क्रिकेट सामन्यांत सात धावा देत विक्रमी सहा विकेट घेतले होते. त्याच्या अफलातून कामगिरीच्या जोरावर भारताने बांगलादेशविरुद्धची मालिका २-१ अशी जिंकली.
from Cricket News in Marathi, क्रिकेट न्यूज़, क्रिकेट ताज्या बातम्या, Marathi Cricket News https://ift.tt/2XcnWne
No comments:
Post a Comment