चौथा कोण? पंत-अय्यर एकत्रच मैदानात गेले तेव्हा...

नवी दिल्ली: चौथ्या क्रमांकावर फलंदाजीला कुणाला पाठवायचं हा भारतीय संघासाठी अजूनही चिंतेचा विषय आहे. आतापर्यंत अनेक युवा फलंदाजांना या क्रमांकावर खेळण्याची संधी देण्यात आली. पण आता चौथ्या क्रमांकावर कुणी जायचं हा संभ्रम युवा फलंदाज रिषभ पंत आणि श्रेयस अय्यरमध्येच निर्माण झालाय. दक्षिण आफ्रिकाविरुद्धच्या टी-२० सामन्यात हेच चित्र पाहायला मिळालं. भारत आणि दक्षिण आफ्रिका यांच्यातील तिसऱ्या आणि अखेरच्या टी-२० लढतीत फलंदाजीदरम्यान अजब किस्सा घडला. दोन फलंदाज बाद झाल्यानंतर चौथ्या क्रमांकावर फलंदाजीसाठी रिषभ पंत आणि श्रेयस अय्यर हे दोघेही एकाचवेळी मैदानाकडे चालले होते. चौथ्या क्रमांकावर फलंदाजीसाठी कोण जाणार आहे याबाबत दोघांमध्येही अस्पष्टता होती. गेल्या काही सामन्यांत चौथ्या क्रमांकावर फलंदाजीसाठी उतरणारा पंत मैदानात गेला. सामना संपल्यानंतर कर्णधार विराट कोहलीला या प्रकारावर स्पष्टीकरण द्यावं लागलं. दोन्ही फलंदाजांपर्यंत योग्यरित्या संदेश पोहोचला नव्हता. त्यामुळं ते दोघेही एकाचवेळी मैदानाकडे जात होते, असं कोहलीनं सांगितलं. 'मला वाटतं की दोघांनाही फलंदाजीचा क्रम लक्षात आला नसावा. ही बाब माझ्या नंतर लक्षात आली. त्या दोघांसोबत फलंदाजी प्रशिक्षकांनी चर्चा केली होती. चौथ्या क्रमांकावर फलंदाजीसाठी कोण उतरेल हे समजून घेण्यात दोघांमध्ये कुठेतरी चूक झाली. हे जरा मजेदारच होतं. जर दोघेही मैदानात पोहोचले असते तर तीन फलंदाज एकाचवेळी दिसले असते आणि हे विचित्रच दिसलं असतं, ' असंही कोहली म्हणाला.

from Cricket News in Marathi, क्रिकेट न्यूज़, क्रिकेट ताज्या बातम्या, Marathi Cricket News https://ift.tt/352l4MW