जोहान्सबर्ग : ऑस्ट्रेलियाचा हॅट्ट्रिक हिरो अॅश्टन एगरने भारताचा अष्टपैलू खेळाडू रवींद्र जाडेजाला रॉकस्टार म्हणत तो आपला आवडता खेळाडू असल्याचं म्हटलं आहे. भारताच्या गोलंदाजीबाबत बोलताना आपण जाडेजाकडून अनेक गोष्टी शिकल्याचं एगर म्हणाला. एगरने दक्षिण आफ्रिकेविरुद्ध मॅच विनिंग खेळी केली. यासाठी आपल्याला भारताविरुद्धच्या वन डे मालिकेत जाडेजाकडून मिळालेल्या टिप्स कशा कामी आल्या याविषयी एगरने सांगितलं. शुक्रवारी दक्षिण आफ्रिकेविरुद्ध झालेल्या पहिल्या टी-२० सामन्यात ऑस्ट्रेलियाने तब्बल १०७ धावांच्या फरकाने विजय मिळवला. या विजयाचा खरा हिरो एगर ठरला. त्याने पाच विकेट घेत हॅट्ट्रिकही नोंदवली. स्वतःच्या गोलंदाजीविषयी सांगतानाच आपण जाडेजाशी बोलून अत्यंत प्रेरित झाल्याचं सांगायलाही एगर विसरला नाही. आपल्याला जाडेजासारखं खेळायला आवडेलं असंही एगर म्हणाला. ‘जाडेजा माझा जगातला सर्वात आवडता खेळाडू आहे. तो खेळतो तसंच क्रिकेट मलाही खेळायचं आहे. तो खरोखरचा रॉकस्टार आहे. फलंदाजी, गोलंदाजी आणि क्षेत्ररक्षणातही तो परफेक्ट आहे. जाडेजा फक्त उपस्थित असला तरीही मला आत्मविश्वास मिळाल्यासारखं वाटतं’, असं तो cricket.com.au शी बोलताना म्हणाला. गोलंदाजीसोबतच रवींद्र जाडेजाच्या फलंदाजीचाही एगर चाहता आहे. तो म्हणाला, ‘ जेव्हा फलंदाजी करतो, तेव्हा त्याच्यामध्ये एक सकारात्मक ऊर्जा असते आणि क्षेत्ररक्षणातही हा ऊर्जा घेऊन तो येतो.’
from Cricket News in Marathi, क्रिकेट न्यूज़, क्रिकेट ताज्या बातम्या, Marathi Cricket News https://ift.tt/2SR3EyV
No comments:
Post a Comment