रांची: दक्षिण आफ्रिकेविरुद्ध सुरू असलेल्या तिसऱ्या कसोटी सामन्यात शतक ठोकणारा भारतीय सलामीवीर याच्या नावावर आणखी एक विक्रम नोंदवला गेला आहे. रोहितनं या सामन्यात चार षटकार ठोकून कसोटी मालिकेतील सर्वाधिक षटकारांचा विक्रम आपल्या नावावर केला आहे. कसोटी मालिकेत सर्वाधिक षटकार ठोकण्याचा विक्रम इंग्लंडचा फलंदाज बेन स्टोक्स याच्या नावावर होता. त्यानं एका मालिकेत सर्वाधिक १३ षटकार मारले होते. रोहितनं आजच्या सामन्यात पहिला षटकार मारून त्याचा विक्रम मोडित काढला. तीन सामन्यांच्या मालिकेतील पहिले दोन सामने जिंकून मालिका खिशात घातल्यानंतर आज भारतीय संघ आत्मविश्वासनं मैदानात उतरला होता. मात्र, सलामीवीर मयाकं अग्रवाल अवघ्या १० धावा करून तंबूत परतला. त्यानंतर आलेला चेतेश्वर पुजारा शून्यावर बाद झाला. तर, कर्णधार विराट कोहलीही १२ धावा करून परतला. त्यामुळं एका क्षणी भारताची अवस्था ३ बाद ३९ अशी झाली होती. एका बाजूला अशी पडझड होत असताना दुसऱ्या बाजूनं रोहितनं किल्ला लढवत शतक साकारलं. १३० चेंडूंमध्ये त्यानं हे शतक साजरं केलं. मालिकेतील त्याचं हे तिसरं शतक ठरलं. त्यात चार षटकार आणि १३ चौकारांचा समावेश होता. आजच्या शतकासह रोहितनं कसोटी क्रिकेटमध्ये २ हजार धावांचा टप्पाही ओलांडला. रोहित या मालिकेत सर्वाधिक धावा, सर्वाधिक शतक, सर्वाधिक षटकार आणि सर्वाधिक चौकार मारणारा फलंदाज ठरला आहे. आफ्रिकेविरुद्ध सर्वाधिक धावा रोहित हा दक्षिण आफ्रिकेच्या विरोधात एकाच मालिकेत सर्वाधिक धावा करणारा भारतीय फलंदाज ठरला आहे. ही कामगिरी करताना त्यानं अनेक दिग्गज भारतीय फलंदाजांना मागे टाकलं आहे. त्यात माजी कर्णधार मोहम्मद अझरुद्दीन (३८८), वीरेंद्र सेहवाग (३७२), मयांक अग्रवाल (३४०), विराट कोहली (३१९) आणि सचिन तेंडुलकर (३२६) यांचा समावेश आहे. तसंच, एकाच मालिकेत तीन शतकं ठोकून त्यानं भारताचे माजी कसोटीपटू सुनील गावसकर यांची बरोबरी केली आहे. वाचा:
from Cricket News in Marathi, क्रिकेट न्यूज़, क्रिकेट ताज्या बातम्या, Marathi Cricket News https://ift.tt/35OZzQ8
No comments:
Post a Comment