दुबई: आयसीसी टी-२० वर्ल्डकपच्या फायनलमध्ये ऑस्ट्रेलिया आणि न्यूझीलंड यांच्यात लढत सुरू आहे. ऑस्ट्रेलियाने नाणेफेक जिंकून न्यूझीलंडला प्रथम फलंदाजीचे आमंत्रण दिले. न्यूझीलंडने प्रथम फलंदाजी करत २० षटकात ४ बाद १७२ धावा केल्या. न्यूझीलंडकडून कर्णधार केन विलियमसनने स्फोटक अर्धशतक झळकावले. वाचा- प्रथम फलंदाजीला आलेल्या न्यूझीलंडची सुरूवात चांगली झाली नाही. २८ धावांवर पहिली विकेट गमावल्यानंतर न्यूझीलंडला पहिल्या १० षटकात फक्त ५७ धावा करता आल्या होत्या. पण त्यानंतर न्यूझीलंडचा कर्णधार केन विलियमसनने ऑस्ट्रेलियाच्या गोलंदाजांचा समाचार घेतला. ड्रक्स ब्रेक घेण्याच्या आधी केनने १९ चेंडूत फक्त १८ धावा केल्या होत्या. त्याचा स्ट्राईक रेट १००च्या खाली होता. मात्र त्यानंतर केन ऑस्ट्रेलियाच्या गोलंदाजांवर तुटून पडला. त्याने २९ चेंडूत ६७ धावा केल्या, त्याचा स्ट्राईक रेट २३१.०३ इतका होता. वाचा- केन १८व्या षटकातील अखेरच्या चेंडूवर केन बाद झाला. त्याने ४८ चेंडूत १० चौकार आणि ३ षटकारांसह ८५ धावा केल्या. या खेळीसह त्यांने संघाला समाधानकारक धावसंख्या उभी करून दिली. त्याच बरोबर टी-२० क्रिकेटच्या इतिहासात फायनल सामन्यात सर्वाधिक धावा करण्याचा विक्रम केनच्या नावावर झाला. याआधी २०१६च्या टी-२० वर्ल्डकपमध्ये वेस्ट इंडिजच्या मार्लन सॅमुअल्सने इंग्लंड विरुद्ध अंतिम सामन्यात नाबाद ८५ धावा केल्या होत्या. या क्रमवारीत केन आता संयुक्तपणे पहिल्या स्थानावर आहे. विशेष म्हणजे तिसऱ्या स्थानावर देखील मार्लन सॅमुअल्सच आहे. त्याने श्रीलंकेविरुद्ध २०१२च्या फायनलमध्ये ७८ धावा केल्या होत्या. चौथ्या स्थानावर भारताचा विराट कोहली आहे. त्याने २०१४च्या फायनलमध्ये श्रीलंकेविरुद्ध ७७ धावा केल्या होत्या. तर पाचव्या स्थानावर गौतम गंभीर असून त्याने २००७ साली पाकिस्तानविरुद्ध ७५ धावा केल्या होत्या.
from Cricket News in Marathi, क्रिकेट न्यूज़, क्रिकेट ताज्या बातम्या, Marathi Cricket News https://ift.tt/3HoU1P5
No comments:
Post a Comment