नवी दिल्ली : दुसऱ्या कसोटी सामन्यापूर्वीच भारतीय संघाच्या अडचणीत वाढ झाल्याचे पाहायला मिळत आहे. त्यामुळे आता ११ जणांचा संघ कसा निवडायचा हा प्रश्न कर्णधार विराट कोहलीपुढे नक्कीच पडला असेल. नेमकं घडलंय तरी काय, पाहा...पहिल्या कसोटी सामन्यापूर्वी भारताचा सलामीवीर मयांक अगरवाल हा दुखापतग्रस्त झाला होता आणि भारतीय संघाला मोठा धक्का बसला होता. मयांक सामना खेळणार नाही हे कळल्यावर लोकेश राहुलला पहिल्या कसोटीत रोहित शर्माबरोबर सलामीसाठी पाठवण्यात आले. राहुलने यावेळी पहिल्या डावात सर्वाधिक ८४ धावाही केल्या. पण आता दुसरा कसोटी सामना सुरु होण्यापूर्वीच भारतीय संघाची संघ निवडण्याची चिंता वाढली आहे. कारण आता मयांक पूर्णपणे फिट झाला आहे. त्यामुळे त्याला आता कोणाच्या जागी संधी द्यायची, हा मोठा प्रश्न असेल. या मालिकेच्या सुरुवातीला राहुल हा मधल्या फळीतील फलंदाज आहे, असे विराट कोहलीने सांगितले होते. मयांक दुखापतग्रस्त झाल्यामुळे राहुलला सलामीची संधी मिळाली, पण आता मयांक फिट झाल्यावर सलामीला कोण येणार, हा प्रश्न कोहलीला सोडवावा लागणार आहे. मयांकला जर सलामीला आणले तर राहुलला कुठे खेळवायचे, हादेखील एक मोठा प्रश्न असेल. कारण आपण फॉर्मात आल्याचे राहुलने दाखवून दिले आहे, त्यामुळे त्याला संघातून वगळणे कोहलीसाठी सोपे नसेल. त्यामुळे आता कोहली, रवी शास्त्री यावर का तोडगा काढतात, याकडे सर्वांचे लक्ष लागलेले असेल. दुसऱ्या कसोटी सामन्यासाठी कदाचित एक प्रयोग म्हणून लोकेश आणि मयांक या दोघांनाही खेळवण्यात येईल. राहुल सलामीला येऊ शकतो आणि मयांक तिसऱ्या क्रमांकावर फलंदाजी करू शकतो. पण त्यासाठी संघातून चेतेश्वर पुजाराला काढण्याचा निर्णय कोहली आणि शास्त्री यांना घ्यावा लागू शकतो. त्यामुळे हा पुजाराला संघाबाहेर बसवण्याचा मोठा निर्णय शास्त्री आणि कोहली घेणार का, याकडे सर्वांचे लक्ष लागलेले असेल. त्यामुळे आता दुसऱ्या सामन्यात लोकेश राहुल, मयांक अगरवाल आणि चेतेश्वर पुजारा यांच्यापैकी कोणाला संधी मिळते, हे पाहणे उत्सुकतेचे असेल. त्याचबरोबर भारतीय संघात आर. अश्विनचे पुनरागमन होणार का, याकडेही सर्वांचे लक्ष असेल. भारताचा संभाव्य संघ : रोहित शर्मा, लोेश राहुल, मयांक अगरवाल/ चेतेश्वर पुजारा, विराट कोहही, अजिंक्य रहाणे, रिषभ पंत, रवींद्र जडेजा, आर. अश्विन/ शार्दुल ठाकूर, मोहम्मद शमी, जसप्रीत बुमरा, मोहम्मद सिराज.
from Cricket News in Marathi, क्रिकेट न्यूज़, क्रिकेट ताज्या बातम्या, Marathi Cricket News https://ift.tt/3fSFejL
No comments:
Post a Comment