वृत्तसंस्था, राजकोट मालिकेतील पहिल्या वन-डे सामन्यात ऑस्ट्रेलियाने यजमान भारतावर मिळविलेल्या एकतर्फी विजयानंतर मालिकेतील दुसऱ्या वन-डे क्रिकेट सामन्यात मालिका वाचविण्याचे दडपण विराट कोहलीच्या भारतीय संघावर असणार आहे. पहिल्या वन-डेत कोहली चौथ्या क्रमांकावर फलंदाजीस आला होता. तो अवघ्या १६ धावांवर माघारी परतला. त्यामुळे महत्त्वाच्या राजकोट वन-डेत कोहली पुन्हा तिसऱ्या क्रमांकावर फलंदाजीस येण्याची दाट शक्यता आहे. अशा परिस्थितीत लोकेश राहुलला चौथ्या क्रमांकावर फलंदाजीस यावे लागू शकते. विशेष म्हणजे लोकेश राहुल आणि शिखर धवन या दोघांनीही आपल्याला कुठल्याही क्रमांकावर फलंदाजी करायला आवडेल, असे म्हटले आहे. मागील लढतीत धवनने ९१ चेंडूंत ७४, तर लोकेश राहुलने ६१ चेंडूंत ४७ धावा केल्या होत्या. त्यामुळे यांचे संघातील स्थान निश्चित राहणार असून, फलंदाजीचा क्रम मात्र बदलणार आहे. त्यामुळे चौथ्या क्रमांकासाठी लोकेश राहुल आणि श्रेयस अय्यरमध्ये स्पर्धा असेल. वाचा- मनीष पांडे की केदार? पहिल्या वन-डेत डोक्याला चेंडू लागल्याने यष्टिरक्षक फलंदाज ऋषभ पंतला दुसऱ्या वन-डेला मुकावे लागले आहे. मात्र, पंतच्या अनुपस्थितीत कोणाला अंतिम अकरात स्थान मिळेल, याबाबत उत्सुकता आहे. मनीष पांडे आणि केदार जाधव यांच्यात मोठी स्पर्धा असेल. शिवम दुबे हा आणखी एक पर्याय संघव्यवस्थापनासमोर आहे. सैनीला मिळणार संधी? वानखेडेवर झालेल्या पहिल्या वन-डेत ऑस्ट्रेलियाच्या मिचेल स्टार्क, पॅट कमिन्स, केन रिचर्डसन, अॅडम झाम्पा, अॅश्टन एगर यांनी अचूक मारा करून भारताला २५५ धावांत रोखले होते. या उलट भारताच्या महंमद शमी, जसप्रीत बुमराह, शार्दूल ठाकूर, कुलदीप यादव, रवींद्र जडेजा यांना ऑस्ट्रेलियाची सलामी जोडीही फोडता आली नव्हती. सलामीच्या अॅरन फिंच आणि डेव्हिड वॉर्नरने विजयी लक्ष्य ३७.४ षटकांतच पूर्ण केले होते. अशा स्थितीत राजकोट वन-डेत गोलंदाजीत बदल होतील का, याबाबतही उत्सुकता आहे. नवदीप सैनीला स्थान मिळण्याची शक्यताही वर्तविण्यात येत आहे. भारत पहिल्या विजयाच्या प्रतीक्षेत भारत-ऑस्ट्रेलियादरम्यानचा दुसरा वन-डे सामना सौराष्ट्र क्रिकेट असोसिएशनच्या स्टेडियमवर होणार आहे. या मैदानावर भारताने आधीच्या दोन्ही वन-डे लढती गमावल्या आहेत. त्यामुळे इथे पहिल्या वनडे विजयाचा प्रयत्न भारतीय संघ करेल. धावांचा पाऊस अपेक्षित राजकोटमध्ये सध्या दिवसाचे तापमान २५ ते २७ अंश सेल्सिअस दरम्यान आहे. त्यामुळे येथील खेळपट्टी कोरडी ठणठणीत आहे. सपाट खेळपट्टीवर धावांचा पाऊस पडण्याची शक्यता विर्तविण्यात आली आहे. लढत : सौराष्ट्र क्रिकेट असोसिएशन स्टेडियम, राजकोट वेळ : दुपारी १.३० पासून
from Cricket News in Marathi, क्रिकेट न्यूज़, क्रिकेट ताज्या बातम्या, Marathi Cricket News https://ift.tt/2G06k6e
No comments:
Post a Comment